Kamahinungdanon sa aquaculture

panahon sa El Nino, gituki sa BFAR

TAGBILARAN CITY Bohol (PIA)— Ang nagkadako nga aquaculture sa Bohol ug ang hinay nga pagpili s amga Bol-anon nga mokaon na sa isda sa tab-ang maoy usa sa mga hinungdan nga nagpabiling adunay igo nga supply sa isda dinhi.

Kini maoy gipadayag ni Bureau of Fisheries and Aquatic Resources (BFAR) Provincial Fisheries Officer Candido Samijon didto sa Kapihan sa PIA.

Hinuon, giangkon usab sa opisyal nga ang suplay, may pagka mahal pa gihapon.

Ang aquaculture, usa gyud sa nakatabang, labi na sa Bohol.

Gani, subay niya, kasagaran sa mga merkado, sa sayo nga buntag, ang makit-an nga isda, bangus ug tilapia, talagsa ra ang presko nga isda gikan sa dagat, tungod na sa aquaculture.

Kon ato nga basehan ang atong statistics sa nasud, ang aquaculture nag-contribute og 55 % samtang ang commercial ug municipal catch fisheries, 45 porsyento lamang, matud ni Samijon, kinsa nagpadayag usab sa mga interbensyon sa kagamhanan aron padaghanon ang suplay sa isda alang sa nagsingabut nga El Nino.

Sa ilang buhatan nga gitahasan sa pagpalapad sa aquaculture, gipasabut sa opisyal nga mogadan og 4 nagdto sa 5 ka buwan, karong mga buwana, dala sa El Nino, kadtong atong gibuhi niadtong mga Enero, mao na ang atong suplay karon, saysay ni Samijon.

Ug dala sa kainit nga mahimong maoy typical nga kinaiya sa El Nino, may dyutay nga kahingawa ang BFAR sa possible nga pagkadaut sa mga upland aquaculture.

Ang mga tilapyahan nga gibuhi sa mga sawod nga lugar, kon maughan sa tubig, kon mahubas ang mga gibuhi-an niini, matud sa BFAR, mahimong lisud ang tilapia, apan, pasalig sa BFAR, dili lamang kana ang suplay sa isda sa aquaculture.

Dugang niya, bisan pa niini, mas daku pa gihapon ang aquaculture areas sa Bohol nga naa sa daplin sa mga baybayon sama sa fishponds, may mga fish cages nga napamatud-an nga nagsuplay sa daku nga volume sa isda.

Bisan pa, gipadayag sa BFAR ang ka importante sa aquaculture sa panahon nga magnihit na ang isda gikan sa dagat. (PIAbohol)

SOBRAS KATUNGA. Matud sa BFAR sa statistics sa konsumo sa Pilipinas 55% sa gikonsumo, gikan sa aquaculture ug 45% lamang ang isda nga gikan sa municipal ug commercial fisheries, mao nga ang pagpamuhig isda, dako og ikahulip sa panahon sa tingnihit, matud ni BFAR bohol Candido Samijon. (PIABohol)