Tubig sa Mabini Cayacay SRIP,

supply sa kabalayan sa Mabini

TAGBILARAN CITY Bohol (PIA)— Kon ikasinabut ang National Irrigation Administration (NIA), himoon sa lungsod sa Mabini ang matigum nga tubig sa Mabini-Cayacay Small Reservoir Irrigation Project (SRIP) nga tinubdan sa ugmaron niini nga panubig alang sa panginahanglan sa katawhan sa lungsod.

Kini maoy gipaambit nga usa sa mga laraw sa local nga kagamhanan pinaagi ni Mayor Grace Ongie Bernales Lim, sa pagpakighinabi atul sa pagtugyan sa P828 milyones nga pasilidad sa patubig alang sa mga basakan sa Abaca, San Roque, Aguipo ug Cabidian sa Mabini ug Cayacay sa lungsod sa Alicia.

Mismo si Presidente Ferdinand Marcos Jr., kauban ni NIA Administrator Engr. Eduardo Guillen ug mga local nga opisyales sa Bohol ug mabini ug Alicia ang nangunay sa pagtukas sa tabil nga magtimaan sa opisyal nga pagbukas sa pasilidad.

Gihimong tigumanan sa tubig gikan sa mga sapa sa Baujanan ug Kawasan, ang Mabini-Cayacay SRIP may kapasidad nga moabut sa 3.82 milyones ka kubiko nga tubig.

Dugang sa babayeng mayor nga sama sa silingang mga lungsod niini, ang Mabini may suliran sa tubig alang sa gamit s apanimalay ug ang kakuwang sa suplay mahimong matubag niini.

Mahimo nga makig MOA kita sa NIA alang sa pagkuha’g water rights alang sa tubig gikan niini, dayag sa mayor.

Gani, sumpay pa niya, ang Alicia, Mabini, Candijay ug bisan ang Ubay, adunay susamang suliran sa tubig alang sa domestic use, hinungdan nga ilang nahunahunaan ang SRIP nga maayong tinubdan.

Sayo pa niini, si NIA Administrator Engr Eduardo Guillen mipadayag nga ang pasilidad, gawas nga tinugdan sa tibuok tubig nga patubig alang sa mga basakan sa 530 ka ektaryas nga nasakop niini, bukas usab kini alang sa aquaculture, power generation ug eco-tourism activities.

Niini, si Mayor Lim mingdugang sa pagpadayag nga ila usab nga buhi-an og tilapia ang impounding, agi og dugang suporta sa mga mag-uuma sa lungsod, samtang mipasalig usab ang mayor nga atimanon ug ampingan ang lugar nga karon nahimo na usab nga usa ka inilang suroyanan sa mga turista. (PIAbohol)

TUBIG MAINOM. Human ipaagi sa proseso, mahimo nga ma-inum ang tubig gikan sa SRIP ug niini, matud ni Maor Ongie Lim nga makigsabut sila sa NIA aron makakuha ang lungsod og water rights sa impounding nga maka supply sa panginahanglan sa katawhan sa Mabini. (PIAbohol)