Mabini-Cayacay SRIP

pangpugong sa lunop

TAGBILARAN CITY Bohol (PIA)— Nahimong gasa ngadto sa katawhang Pilipino gikan sa nasudnong kagamhanan pinaagi sa National Irrigation Administration (NIA) ang P828 milyones nga Mabini Cayacay Small Reservoir Irrigation Project (SRIP), nag di lang alang sa irigasyon, apan usab pagluwas sa kadaut sa lunop.

Ang pasilidad usab, gibuksan mismo ni Presidente Ferdinand Marcos Jr., kinsa nanguna sa pagtukas sa tabil nga nagpadayag sa opisyal nga pagbukas sa kinatibuk-ang serbisyo sa pasilidad sa irigasyon nga natapos sa ika 63 nga pagsaulog usab sa katukoran sa NIA.

Gisugdan pinaagi sa groundbreaking ceremonies niadtong 2017, ang Mabini-Cayacay SRIP una na nga nakaalagad sa 230 ka ektaryas sa kinatibuk-ang 530 ektaryas nga gidesinyo alang niini.

Ang 530 ka mag ektaryas nga mga umahan, gitagana alang sa humayan.

Apan gamit ang una nga nahuman nga pipila niini ka diversion canals nga magamit na, nagpadagayday na kini og sugod niadtong 2025, segun sa mga mag-uuma nga nakasinati sa serbisyo.

Gipatuman ang konstraksyon pinaagi sa hugna-hugna nga pagtrabaho, ang pasilidad, sama sa tumong niini nga pag-pasaka sa ekonomikanhong kahimtang sa mga kabus nga mag-uuma, wa damhan nga magamit diay usab kontra sa baha.

Matud ni NIA administrator Engr. Eduardo Guillen, ang proyekto, dili lamang usa ka impounding dam o tigumanan sa tubig alang sa irigasyon.

Mahimo usab kining magamit alang sa pagpamuhi og isda, (aquaculture) tinubdan sa koryente (power generation) ug lugar nga bisitahan sa mga turista, dayag ni Administrator Guillen atul sa programa.

Labaw sa tanan, kini usa ka flood control project, butyag ni Guillen.

Kaniadto, sa mga higayon nga may kusog nga uwan sa bukid, ang tubig baha kasagaran magdungan og banlas ngadto sa mga patag nga humayan sa Cayacay ug Napo, nga maoy hinungdan sa pagkadaut sa mga humay sa senemana ka dugay nga baha.

Apan, karon, inay moderecho og banlas ang tubig, mapundo kini sa dam, ug kon may timailhan na nga moawas, abrihan niini ang mga diversion canals, nga inay mopadirekta sa tubig ngadto sa mga humayan sa ubos, adto kini kasulod sa mga humayan nga sawod, o kadtong dili sagad maabut sa patubig, aron makabenepisyo usab sila, pasabut ni Dionisio Gulle Ugay, sakop sa Board of Trustees sa Mabini Cayacay Irrigators Association.

Kini usab gidasonan ni Roberto Tuyor, taga cayacay, kinsa mipadayag nga karon, wala na sila makasinati og baha ug wala nay paglunop sa iyang area.

Pinaagi niini, macontrol na ang tubig, kay inig apaw, abrihan man ang diversion u gang tubig, adto ipadulong sa mga basak nga di matubigan, aron makabenepisyo usab ang mga di mapatubigan. (PIABohol)

MAKAANI NA. Usa si Dionisio Ugay sa mga mag-uuma nga mipadayag nga nahatagan rag solusyon ang grabeng paglunop sa mga kabasakan sa Cayacay ug Napo, kay inay mobanlas dayon ang tubig-uwan gikan sa bukid, mapugngan kini sa dam, ug kon moapaw na, abrihan ang kadtong mga canal nga dili sagad masudlan aron ang sobrang tubig magamit usab sa mga basakang sawod. (PIAbohol)