Napulpog nga canals, 2011

pa gisugdan og tukod- NIA

TAGBILARAN CITY Bohol (PIA)— Sa wala pa ang gipahigayon nga pagtugyan sa Mabini-Cayacay Small Reservoir Irrigation Project (SRIP) nakaprograma na ang rehabilitasyon ug pag-ayo sa mga karaan na nga siphon canals nga gitukod niadto pang 2011 ug nasakop na sa irrigation system.

Kini maoy unod sa pahayag ni National Irrigation Administration Region 7 Regional Manager Engr. Eusebio Villamanto, didto sa Kapihan sa PIA.

Si Villamanto, kinsa naatlan nga mingsunod na lang human sa mga Regional Directors sa NIA nga natugyanan sa pagtukod sa proyekto, nagdumili sa pagtumbok sa kinsa’y angay basolon sa nangadugmok nga canals nga nahimong viral dihang gipagawas sa usa ka vlogger.

Matag proyekto, may mga dokumento, may inspeksyon nga himoon sa mga engineers, may testing, ug panumpaan kini sa dili pa dawaton isip nahuman nga proyekto, ug kay nakapasar, nagpasabut lamang nga maayo ang pagkabuhat, saysay sa opisyal.

Hinuon, sa kadugay na nga nagbarug sa nahisgutang kanal nga diha sa viral video, nasubay na kini sa NIA ug diha nga nakit-an, may pundo na nga gipangayo aron kini mapaayo, bisan sa wala pa ang pagtugyan, dugang niya pagpasabut.

Sa wala apa ang pagtugyan, gisubay sa NIA ang kinatibuk-ang mga pasilidad sama sa mga canals, aron maseguro nga walay tubig nga mausik kon magpasugod na og paagas, mao nga tumbok na kon diing dapita ang nagkinahanglan sa dinali-an nga pagpahiuli, padayag sa opisyal sa NIA.

Wala usab mosumpay ang regional manager kabahin sa kalidad sa materyales nga gigamit, sanglit misalig kini sa katakus sa mga nag-unang opisyal ug sa unsay matang sa materyales nga gidapat.

Gibutyag usab ni NIA-7 Engineering section Chief Engr Allan Revita nga 2011 pa, dihang nakapagawas og ginagmay nga mga pundo ang NIA, nga gipahiluna ang pipila niini ka mga canals nga mahimo nga parte na sa himoon nga higanteng dam sa Mabini, Bohol.

Ang pundo sa Mabini-Cayacay SRIP, gipagawas sa hugnahugna nga paagi, ug sa 2017 dihang gihimo ang groundbreaking, didto na ang pundo alang sa embankment sa dam samtang lima n aka tuig ang mga pasilidad sama sa canals nga natukod ug nabantang sa uwan ug init, sumpay ni Engr. Revita nga possible nga nagpadali sa pagkadaut niini.

Sa semana mismo nga gipagawas ang viral video, mao usab ang panahon nga isugod na ang pagpa-ayo, matud sa NIA.

Ang Mabini Cayacay SRIP, nahimo na nga partly operational sa mi-aging tuig, ug human ikatugyan, full operationalization na. (PIAbohol)

WALAY GIBASOL. Si NIA-7 RM Eusebio Villamanto, kinsa nagsunod lamang sa proyekto, mibutyag nga may proseo ang goberno sa pagsuta sa kalidad sa trabaho, ug kini gihimo sa mga opisyales sa NIA subay sa mga dokumento. Hinuon, butyag sa ahensya, niadto pang 2011 gitukod og una ang mga canals sa dam, samtang sa 2025 na nga nahuman ang proyekto. (PIAbohol)