PhilHealth nipasidaan batok sa mga pekeng SMS

blasts nga nagpunting sa datos sa mga miyembro

TAGBILARAN CITY, Bohol (PIA)—Ang Philippine Health Insurance Corp. (PhilHealth) niadtong Huwebes mipahimangno sa publiko batok sa pagpakatap sa mga malimbongong text messages ug dili awtorisado nga website nga gidesinyo sa pagkawat sa personal ug pinansyal nga datos sa mga miyembro.

Ang PhilHealth nagpagawas sa Advisory 2026-0032, nga nagpahibalo sa mga rehiyonal nga opisina niini ug sa publiko nga ang mga kadudahang SMS o text blasts karon nagdirekta sa mga nakadawat sa usa ka imposter nga website nga naghangyo sa mga tiggamit nga i-update ang ilang "health insurance identification information.”

Gi-klaro sa PhilHealth nga kini nga mga mensahe ug ang online platform dili awtorisado ug daw kabahin kini sa malisyosong phishing scam nga gi-orkestra sa mga cybercriminals.

“PhilHealth does NOT send unsolicited SMS messages containing links requiring members to update personal or account information (Ang PhilHealth DILI magpadala og mga wala gipangayo nga mga mensahe sa SMS nga adunay mga link nga nanginahanglan sa mga miyembro nga mag-update sa personal o kasayuran sa account)," matud pa sa advisory sa PhilHealth.

Gitataw sa ahensya nga ang tanang opisyal nga transaksyon higpit nga gihimo pinaagi lamang sa mga awtorisadong plataporma ug opisina sa PhilHealth.

Subay niini, ang PhilHealth kusganong nag-awhag sa tanan nga mga miyembro ug mga stakeholder nga dili mag-click sa mga kadudahang link, maghatag og personal nga datos, o magpaambit sa kompidensyal nga kasayuran.

Gitambagan usab niini ang publiko nga kanunay nga susihon ang pagkatinuod sa bisan unsang komunikasyon pinaagi sa mga opisyal nga agianan sa dili pa molihok.

Aron mapugngan ang pagkuyanap sa scam, ang tanang PhilHealth regional offices gimandoan sa pagpakatap sa advisory sulod sa ilang tagsa-tagsa ka dapit sa hurisdiksyon.

Gimanduan usab ang mga rehiyonal nga buhatan sa hugot nga pagmonitor ug pagtaho sa susamang mga insidente ngadto sa hingtungdan nga mga unit ug sa aktibong pagtabang sa pag-edukar sa mga miyembro kon unsaon pag-ila ug paglikay sa phishing scheme. (ECB/PIA-7 Bohol)

Nagpagawas ang Philippine Health Insurance Corp. (PhilHealth) niadtong Huwebes og public warning kalabot sa kadudahang SMS/Text Blast ug Fraudulent Website nga nag-impersonate sa PhilHealth. (PIA)