BOC nipasidaan sa publiko batok sa scam nga
naglambigit sa mga paketeng ilang gihuptan

TAGBILARAN CITY, Bohol (PIA)—Nipasidaan ang Bureau of Customs (BOC) sa publiko batok sa mga "love scam" nga naglimbong sa mga biktima aron mobayad og kwarta alang sa pagpagawas sa usa ka gituohang padala o regalo.

Sa usa ka pahayag niadtong Sabado, nag-ingon ang BOC nga gigamit sa mga scammer ang ngalan sa ahensya aron mahimong katuohan ang ilang pagpangilad ug kombinsihon ang mga biktima nga kinahanglan silang mobayad og mga bayranan una pa mapagawas ang pakete.

Kasagaran magsugod ang modus pinaagi sa pag-ila-ila sa social media, messaging apps, o online dating platforms. Human makuha ang pagsalig sa biktima, moingon ang scammer nga nagpadala siya og regalo gikan sa gawas sa nasud, sama sa alahas, gadgets, kwarta, o uban pang mahalon nga mga butang. Sa pipila ka higayon, magpadala una sila og gamay ug tinuod nga pakete aron makuha ang pagsalig sa biktima.

Sa kadugayan, makadawat ang biktima og tawag, text, o mensahe gikan sa tawo nga nagpakaaron-ingnon nga empleyado sa Customs, kinsa moingon nga gi-hold o gipugngan ang pakete samtang naghuwat sa bayad sa mga duty, buhis, processing fees, o uban pang bayranan.

Aron mahimong katuohan ang ilang limbong, mogamit ang mga scammer og peke nga mga invoice, shipping documents, tracking records, ug bisan mga peke nga tracking website.

Mahimo usab silang magpadala og mga litrato sa pakete o mahalon nga mga regalo nga gi-edit gamit ang teknolohiya aron kombinsihon ang biktima nga tinuod ang maong padala.

Sa mga gitaho nga kaso, dugang sa BOC nga gipabayad ang mga biktima pinaagi sa personal nga bank accounts, e-wallets, o money remittance services, samtang ang uban gipabayad og balik-balik alang sa nagkalain-laing gituohang bayranan una pa mapagawas ang pakete.

Gi-klaro ni Commissioner Ariel Nepomuceno sa usa ka pahayag nga dili kini bahin sa bisan unsang opisyal nga proseso sa ahensya, ug gipasiugda nga walay empleyado o opisyal sa BOC ang gitugotan nga mangayo o modawat og bayad pinaagi sa personal nga bank accounts, e-wallets, o money remittance services.

Nanawagan kini sa publiko nga magmabinantayon sa pagpakig-ila-ila sa mga tawo online ug i-report dayon ang mga kadudahang tawag, mensahe, o email nga naggamit sa ngalan sa Customs aron mangayo og kwarta. (ECB/PIA-7 Bohol)

Nagpahimangno ang Bureau of Customs (BOC) sa publiko batok sa mga "love scam," diin gilimbongan ang mga biktima nga mobayad og kwarta aron kuno makuha ang usa ka padala o regalo nga giingong gihuptan sa Customs. Niini nga modus, gigamit sa mga scammer ang ngalan sa ahensya aron mahimong katuohan ang ilang pagpangilad ug kombinsihon ang mga biktima nga kinahanglan silang mobayad og mga bayranan una pa makuha ang maong padala. (BOC/PIA)