Mga proyekto sa imprastraktura sa lungsod sa Sevilla

ubos sa LGSF program hapit na mahuman

TAGBILARAN CITY, Bohol (PIA)—Unom ka mga proyekto sa lungsod sa Sevilla nga gipundohan pinaagi sa Local Government Support Fund-Retooled Community Support Program-Support to the Barangay Development Program (LGSF-RCSP-SBDP) ang hapit na mahuman.

Nakadawat ang local government unit sa Sevilla og P40 milyones niadtong Marso 2026 alang sa mga prayoridad nga proyekto niini.

Ang unom ka proyekto naglangkob sa pagkonkreto sa farm-to-market roads (FMRs) sa lima ka barangay ug pagtukod og health station.

Ang mga road projects anaa sa Barangay Bayawahan (P10 million), Barangay Calingaan (P10 million), Poblacion 2 ngadto sa Cabugao sa Barangay Calinginan Norte (P6 million), Sitio Manhag ngadto sa Ubogon sa Barangay Calinginan Norte (P4 million), ug Barangay Calinginan Sur (P7 million).

Ang health station anaa sa Barangay Calingin Sur (P3 milyones).

Matud pa ni Municipal Planning and Development Coordinator Geruncio G. Cutin Jr., ang status sa 6 ka mga proyekto sa Hulyo 2026 mao ang mosunod: Calinginan Norte FMR sa Sitio Manhag, 85% kompleto (0.400 kilometro, 4 metros ang gilapdon); Calinginan Norte FMR sa Sitio Cabugao, 50% (0.590 km, 4 m ang gilapdon); Calinginan Sur FMR, 50% (0.712 km, 4 m ang gilapdon); ang health station sa Calinginan Sur, 25%; Bayawahan FMR, 15% (0.785 km, 5 m ang gilapdon); ug ang Calingaan FMR, 25% (0.905 km, 4 m ang gilapdon).

Si Sevilla Mayor Emmanuel C. Caberte miingon nga ang pondo usa ka bahin sa National Task Force to End Local Communist Armed Conflict (NTF-ELCAC), nga nagdala sa imprastraktura, serbisyo sosyal ug kalamboan sa mga komunidad.

Matud pa ni Caberte nga yano lang ang ilang tumong nga mao ang maseguro nga ang kalinaw ug kalamboan mag-uban. Pinaagi sa pagsulbad sa mga hinungdan sa kagubot pinaagi sa makahuloganon nga mga proyekto ug serbisyo, nagtukod sila og mas lig-on, ug mas mauswagon nga kaugmaon alang sa tanan.

Nanawagan siya sa mga lider sa komunidad ug sa mga residente nga aktibong moapil sa pag-monitor niini nga mga proyekto, aron masiguro nga mahuman kini sa episyente nga paagi ug makatubag sa dugay na nga mga panginahanglan sa katawhan.

Ang LGSF-RCSP-SBDP usa ka programa sa nasudnong gobyerno nga naghatag og pondo alang sa mga imprastraktura ug batakang serbisyo sa mga barangay nga kaniadto naapektuhan sa insurhensya sa mga komunista ug karon gideklarar na nga limpyo na gikan niini.

Ubos sa NTF-ELCAC, ang mga residente mismo niining mga barangaya ang nagpili sa ilang mga prayoridad nga proyekto — sama sa mga kalsada, sistema sa tubig, health station, ug elektripikasyon — nga direktang pondohan sa gobyerno. (ECB/PIA-7 Bohol)

Ang pagkonkreto sa farm-to-market road sa Sitio Cabugao, Barangay Calinginan Norte, lungsod sa Sevilla, anaa na sa 50% na nga kompleto niadtong Hulyo 2026, nga naglangkob sa 0.590 kilometros ug 4 metros ang gilapdon. (Hulagway gikan sa Sevilla MPDC)