DepEd misubli sa polisiya bahin sa paggamit

og mga gadget atol sa oras sa klase

TAGBILARAN CITY, Bohol (PIA)—Gisubli sa Department of Education (DepEd) niadtong Miyerkoles nga gidili ang paggamit og mga gadget atol sa oras sa klase sa mga pampublikong eskwelahan sa tibuok nasud.

Kini subay sa DepEd Order (DO) No. 6, series of 2026, o ang Guidelines on Ensuring a Safe and Motivating Learning Environment (ESMLE).

Sa usa ka memorandum, ang DepEd miingon nga ang estrikto nga mga giya nagpunting sa pagpasiugda sa luwas ug responsable nga paggamit sa internet ug mga may kalabotan nga device.

Matud pa sa Office of the Secretary, ang DO klarong nagdili sa paggamit sa portable electronic devices atol sa oras sa pagtudlo sa mga estudyante ug mga personahe diin naglakip kini sa pagdili sa paggamit sa, apan dili limitado sa, social media, online games, paghimo og content, ug vlogging atol sa oras sa klase.

Apan bisan pa niini, ang DepEd miingon nga ang paggamit sa gadget gitugotan lamang alang sa mga katuyoan sa edukasyon o emerhensya.

Alang sa mga katuyoan sa akademiko, kini naglakip sa pag-access sa mga plataporma sa edukasyon, digital resources, o pag-apil sa mga awtorisado nga online collaborative nga mga kalihokan.

Ang paggamit atol sa mga sitwasyon sa emerhensya naglakip usab sa pagpadali sa komunikasyon atol sa mga katalagman, krisis sa medikal, o uban pang diha-diha nga mga kabalaka sa kaluwasan.

Gimandoan dayon sa ahensya ang tanang field offices ug mga pampublikong eskwelahan nga hingusgan ang information drives bahin sa responsableng paggamit sa internet ug uban pang mga devices sa tibuok nasud. (ECB/PIA-7 Bohol)

Gisubli sa DepEd ang kasamtangang palisiya nga nagdili sa mga estudyante ug mga kawani sa eskwelahan sa paggamit og mga gadget atol sa oras sa klase, gawas lang sa mga katuyoan sa edukasyon o panahon sa mga emerhensya. Gi-awhag usab ang mga eskwelahan nga pakusgan ang mga kampanya nga nagpasiugda sa luwas ug responsable nga paggamit sa mga gadget. (DepEd/PIA-7 Bohol)