Tagbilaran City Gov’t nakakuha og 5-star rating

tungod sa talagsaong pagpatuman niini sa GEMP

TAGBILARAN CITY, Bohol (PIA)—Ang kagamhanang lokal sa Tagbilaran gihatagan og 5-Star Rating (Grade A) tungod sa talagsaong pagpatuman niini sa Government Energy Management Program (GEMP) subay sa Republic Act No. 11285, o ang Energy Efficiency and Conservation Act of 2019.

Ang maong pag-ila naggikan sa mga paningkamot sa syudad sa episyenteng pagdaginot sa kuryente ug gasoline samtang gipatuman niini—kauban ang ubang mga local governments, mga ahensya sa gobyerno, ug mga korporasyon nga gipanag-iya ug kontrolado sa gobyerno—ang GEMP.

Ang GEMP usa ka programa sa tibuok gobyerno nga nagtumong sa pagpakunhod sa binulan nga konsumo sa kuryente ug mga produktong petrolyo sa gobyerno.

Gikan sa perpektong score nga 100, nakakuha ang syudad og impresibong 96 puntos, nga nagbutang niini sa kinatas-ang kategorya sa rating—5 Stars (Grade A).

Pormal nga gidawat ni City General Services Office (CGSO) Head Chris John Rener Torralba ang Energy Audit Rating gikan sa assessment team sa Department of Energy (DOE) human sa komprehensibong ebalwasyon sa Tagbilaran City Hall ug sa Sangguniang Panlungsod Building.

Ang espesyal nga pagdayeg gipaabot usab ni Torralba ngadto sa mga empleyado sa CGSO nga nanguna sa pag-andam sa tanang gikinahanglang mga dokumento, ug ngadto sa tanang departamento ug opisina sa City Hall tungod sa matinud-anong pagsunod sa mga polisiya sa syudad bahin sa pagdaginot sa gasolina ug kuryente, nga dakog natabang niining maong kalampusan.

Iya usab gipasalamatan sila Mayor Jane Yap, Vice Mayor Adam Jala, ug Congressman John Geesnell Yap II tungod sa ilang lig-on nga pagpangulo, paggiya, ug walay paglubad nga suporta sa pagpalambo sa mga inisyatibo sa syudad alang sa episyenteng paggamit sa enerhiya. (ECB/PIA-7 Bohol)

Tungod sa mga paningkamot sa kagamhanang lokal sa syudad sa Tagbilaran sa episyenteng pagdaginot sa kuryente ug gasolina, nakadawat kini og 5-Star Energy Audit Rating (Grade A) gikan sa Department of Energy. (ECB/PIA-7 Bohol)