DOST-PCIEERD, BISU, Bohol

Molusad sa LAAG Bohol app

TAGBILARAN CITY, Bohol (PIA)—Ilusad sa Department of Science and Technology-Philippine Council for Industry, Energy, and Emerging Technology Research and Development (DOST-PCIEERD), kauban sa Bohol Island State University (BISU), Balilihan Campus, ug lalawigan sa Bohol ang Laag Bohol Web-App: Enhancing Tour Guides and Tourists' Experience karong umaabut nga Julyo 23, 2026, didto sa National Museum of the Philippines–Bohol, Tagbilaran City, Bohol.

Ang Laag Bohol Web App gipundohan sa DOST-PCIEERD’s Regional Research Institution (RRI) program, ug usa ka sentralisadong hawanan nga magsumpay sa mga tour guides, operators, transport providers, ug mga turista aron pamaayohon pa ang akses., komunikasyon, ug ang kasinatian alang sa hingpit ug makatagbaw nga paglaag dinhi sa Bohol.

Usa ka digital tourism platform alang sa kinatibuk-ang Bohol nga giugmad ubos ni Gobernador Erico Aristotle Aumentado, ang LAAG nagpasabut og Lifework Andragogy for Advanced Guides ug kini gimugna aron pamodernohon ug himoong mas propesyonal ang pamaagi sa sector sa turismo pinaagi sa usa ka web-based nga sistema.

Kini maghatag na og mga training modules alang sa mga tour guides ug tourism operators samtang nagkolekta ug nagdumala sa mga bag-ong kasayuran ug datus sa turismo nga makatabang unya sa mga pagplano alang sa kaugmaon sa turismo.

Gikan usab niini, makahimo na ang Bohol sa pagkuha sa mga haum ug sakto nga kasayuran alang sa mga destinasyon ug suroyanan para mahimong kasaligan nga tinubdan sa saktong promosyon.

Niini, milaum si Gob Aumenatdo, didto sa paglagda niini nga ang inisyaltiba sa DOST-BISU ug Bohol makasuporta sa mas malungtaron nga kalambuan lukop sa Bohol ug makatabang sa mas maayo, mas paspas nga koordinasyon sa Bohol Tourism Office, tour guides, transport providers, establisemento sa turismo ug sa mga turista nga mobisita sa Bohol.

Matud pa sa Kagamhanang Probinsyal sa Bohol, ang web-application makagiya unya sa mga tour guides sa pagkuha sa mga gikinahanglang propesyonal nga pagpaugmad sa kaugalingon, certification courses samtang makatabang sa pagpatambok sa kasayuran sa usa na lamang ka digital ecosystem.

Niini mapahimong bukas ang mga kasayuran kabahin sa turismo, makatabang sa pagpanindot sa mga proseso ug makabaton ang katawhan sa pag-grado sa mga establisemento sa serbisyo nga gitanyag niini.

Dumalahon sa Bohol pinaagi sa Provincial Tourism Office (BPTO), sila na ang magmonitor sa mga kalihukan ug sa mga nalambigit nga sektor pinaagi sa usa ka centralized dashboard.

Hinuon, gitin-aw sa Provincial Government nga ang LAAG Bohol dili commercial app sama sa Agoda, Booking.com, o Airbnb, hinuon, kini usa ka sistema sa pagdumala sa turismo, pagmonitor ug pagtigum sa kasayuran nga makapalig-on usab sa mga pamaagi , nga stakeholders sulod niini ug sa komunidad, pinaagi sa husto nga pagdumala subay sa buhi nga kasayuran.

Niini, mas sayun na usab alang sa Bohol sa pag-digitize sa tourism services, pagpaugmad sa kahanas sa mga local tour guides, pagpanindot pa sa kasinatian sa mga bisita samtang palig-onon niini ang turismo nga molahutay ilabi na sa pagpalig-on sa Bohol isip UNESCO Global Geopark ug nag-unang destinasyon sa nasud. (PIAbohol)