PPOC mingtugot ni Gov Aris

sa dugang P8M ‘intel funds’

TAGBILARAN CITY, Bohol (PIA)—Giresolbar sa hiniusang bahan sa Provincial Peace and Order Council (PPOC) ug sa Provincial Anti Drug Abuse Council (PADAC) ang pagpagawas ug pagtugot sa paggamit sa P8 milyones nga dugang pundo isip intelligence funds agi og abag sa pagpatunhay sa kahapsay ug kalinaw.

Didto sa labing uwanhing hiniusang tigum sa duha ka mga nag-unang konseho nga nahitabo didto sa Ceremonial Hall sa Kapitolyo, Septembre 21, gituki sa duha ka mga konseho ang hisgutanan sa intelligence fund, nga gikinahanglan alang sa katapusang kwarter sa tuig, aron mapatunhay ang mga kadaugan nga nakab-ot sa konseho sa pagpalapad sa kahapsay ug kalinaw.

Kahinumduman nga subay sa balaod, ang local nga kagamhanan gitugotan nga mopahat sa kantidad alang sa espesyal nga mga galastohan alang sa pagpangtigum og kasayuran, pagpaniid, paghatag og ganti bugti sa kasayuran, abangan sa mga safehouses, mga kagamitan, mga sakyanan, mga tambal ug mga galastohan nga direkta nga magpatunhay sa kahapsay ug kalinaw ug nasudnong seguridad.

Dili pa dugay ang Sangguniang Panlalawigan (SP) nagpagawas og usa ka balaodnon nga nagpahat sa supplemental budget diini kauban niini ang P8 milyones nga dugang intelligence funds alang sa peace and order programs sa Kapitolyo.

Gawas sa kriminalidad nga labing daku nga hulga sa kaugmarang ekonomikanhon tungod sa pagpatalaw niini sa mga puhunan, nagpabilin pa usab nga suliran ang patigayon sa ilegal nga drugas.

Kini kaoy buot sa PPOC ug PADAC nga matutokan, aron usab mas mapa-aghat pa ang mga mamumuhunan nga mopuyo sa Bohol ug sa ilang pag-anhi, makabukas og mga negosyo nga magpasugod og kapanarbahoan.

Aron kini mahitabo, gimbuhaton sa duha ka konseho ang paglarot niining mga suliran, nga manginahanglan sa mas lawom nga pagbatok, ug ang kasayuran nga gastohan sa intelligence funds, maoy magpabungkag sa ilang mga laraw, mapugngan dala sa sayo nga pagsumbong, aron masumpo.

Nunot usab niini, nagpagawas na usab ang SP sa pagtugot kang Gobernador Erico Aristotle Aumentado sa paggamit sa dugang pahat, sa iyang gahum isip tsirman sa PPOC, alang sa pagpalapad pa sa kasayuran aron sumpoon ang mga kriminalidad ug bungkagon ang mga hugpon sa mga criminal nga naghulga sa padayon ga kahapsay ug kalinaw. (PIABohol)