Philippine Mining Act, 

lusot na sa House panel 

TAGBILARAN CITY, Mayo 23 (PIA)--Obligahon na ang mga mining companies sa nasod nga mokuha og prangkisa sa Kongreso human gi-aprubahan sa House Committee on Legislative Franchise ug Committee on Natural Resources ang House Bill 6259. 

Nakalatid sa maong balaodnon ang pag-amyenda sa Philippine Mining Act of 1995 diin ang mga responsableng mining operators lang ang tugotan samtang susihon usab og maayo ang mga minahan nga mo-apply og prangkisa. 

Kun mapalabang na kining balaodnon, mahimong pre-requisite ang pagkuha og legislative franchise sa mga pribadong kontractors sa dili pa tugotan nga mo-apply og large-scale quarrying permit o exploration permit. 

Nahisulod usab dinhi ang paghatag og duha ka tuig nga tagal sa existing contract holders aron mokuha og prangkisa ug did-an ang bisan unsang kalihokan sa pag-mina sa mga critical watersheds. 

Samtang hatagan usab og fiscal ug non-fiscal incentives ang mga domestic mineral processing private contractors ug pahamtangan og hangtod 60 porsyento nga export tax sa mga e-eksport nga domestic raw ore aron magbaton og benepisyo ang mga lugar nga gikuhaan sa minerals. 

Gipasabot sa nag-unang milagda sa maong balaodnon nga si House Speaker Pantaleon Alvarez nga pinaagi sa maong balaodnon, masusi og maayo sa Kongreso kun kinsa ang mga responsableng mining firm ang angay lamang mag-operate sa nasod. (ecb/PIA7-Bohol).