Asa ka, sa libre nga bakuna 

O sa sama ra, apan bayaran? 

TAGBILARAN CITY, Bohol, November 13, (PIA)—Asa man ka, sa libre nga bakuna batok sa tipdas, o sa imong paborito nga pediatrician aron mobayad ka og P1,300, wala pay apil ang bayad sa pagpakonsulta nga usahay mokabat pa sa P500? 

Pili na. Kay samtang naghunahuna ka pa, dul-an sa usa ka semana na lang ang nahibilin nga oras, matapos na ang libre nga pagpangbakuna sa kabataan batok sa tipdas. 

Human niini, ang pagpangbakuna sa bata, kon adto himoon sa pribado nga mga clinics ug himoon sa mga doctor, mahal na, apan susama ra sa kalidad nga gitugot sa World Health Organization and bakuna nga ihatag. 

Kini dala sa, ang giprograma sa kagamhanan nga libre nga pagpangbakuna batok sa tipdas nagsugod niadtong Oktubre 22 ug matapos sa sunod semana, Nobyembre 23. 

Ang tipdas sakit nga kasagaran maka-igo sa mga bata ug kini dala sa mananakod nga virus nga tipdas. 

Kini mahimong manakod pinaagi sa pag-ubo, pagpanghatsi ug pagpaduol-duol sa tawo nga gitipdas. 

Aron makalikay sa tipdas, pabakunahan ang mga bata nga 6 ka buwan ngadto sa 59 ka buwan ang edad sa libre nga bakuna batok sa tipdas, matud ni Dr. Jeanette Pauline Arellano Cortez, atul sa pagpakigtagbo sa mga sakop sa media sa Bohol. 

Alang sa mga ginikanan nga nangahadlok sa pagpabakuna dala sa kontrobersiya nga nahitabo sa Dengvaxia, gipasalig ni Dr. Cortes nga ang bakuna nga gigamit karon batok sa tipdas, gigamit ug nasuwayan na sa dul-an sa 30 ka tuig. 

“Ug sama sa uban nga mga bakuna sa bata, ang bakuna sa tipdas mi-agi usab sa makuti nga pagtuki aron maseguro nga kini epektibo ug luwas,” pasabut sa mananambal nga naa sa Department of Health Center for Disease Control Region 7. 

Mipasabut usab ang mga tinugyanan sa kasanihan: Pagka-human og bakuna, mahimo nga hilantan ang bata, mokatol ug mamula-pula ang parte sa lawas nga gitupokan sa bakuna. Kini, dili angay ikahingawa kay normal kini nga reaksyon sa lawas inig dawat sa bakuna. 

Kon may gibati ang inyong mga bata nga lahi ra sa kasarangan, ayaw pagpanuko sa pag-adto sa labing duol nga Health Center aron magpakonsulta. 

Agi og panapos, matud sa mga tinugyanan sa DOH, ang pagtuman sa pagpaningkamot sa katilingban nga ikapatuman ang pagpangbakuna, dili lamang napaneguro ang kaugmaon sa kahimsug sa banay ug pangawarta, imo usab nga gitabangan ang komunidad nga kakubsan ang risgo sa pagsulod sa virus sa imong komunidad subay sa bata nga wala magbutang og panalipod batok sa sakit nga mawala na unta kon nabakunahan. 

Angayan nga hinumduman, nga kon ang bata masakit ug masulod sa tambalanan, may mga galastohan pa gawas sa pagpatambal ug pagpa-ayo: mopalta sa trabaho ang ginikanan aron maka-atiman sa nasakit, nga maghikaw na usab sa swelado nianang adlawa. May mga balayranan sa insurance, ug kon magdugay ang sakit, mas daku ang alkanse. 

Ug kon ang bata nga wala kabakunahi, makaduol sa may sakit, mahimong kini nga bata maoy magdala sa sakit nga makapapatandog sanormal nga sitwasyon ug makapasugod na usab hinuon sa mas lisud nga mga kwarantina, saysay sa tinugyanan sa DOH. 

Busa, ning nahimilin nga mga adlaw, unsa pa may gihuwat? Dalha na ang inyong mga bata sa labing duol nga Health Center, aron mabakunahan og mapatakan sa oral polio vaccines. (rahc/PIA-7/Bohol)