Filipino Sign Language, 

gi-deklarang nat’l sign language 

TAGBILARAN CITY, Nov. 13 (PIA)--Gilagdaan na ni Presidente Rodrigo Duterte ang balaod nga nagdeklarar sa Filipino Sign Language isip national sign language sa mga Pilipinong adunay hearing impairment o kakulian sa pangdungog. 

Ubos sa Republic Act No. 11106, gamiton na kini isip opisyal nga sign language sa tanang transaksiyon sa gobyerno nga may kalabotan sa mga bungol o amang. 

Tumong sa Filipino Sign Language Act nga tangtangon ang tanang matang sa diskriminasyon batok sa mga adunay kakulian sa pangdungog. 

Nalatid sa balaod nga angay gamiton ang Filipino Sign Language sa mga eskwelahan, broadcast media ug trabahoan. 

Ang University of the Philippines ug uban pang ahensiya sa edukasyon ang gitahasang mohimo og sumbanan alang sa paghimo og mga training materials kalabot sa edukasyon sa mga may kakulian sa pangdungog o hearing impaired. 

Nakalatid usab sa maong balaod nga angay may mga kwalipikadong sign language interpreter sa tanang court hearing, proceeding, ug transaksiyon sa gobyerno alang sa mga may kakulian sa pangdungog. 

Usa ka tuig human mahimong epektibo kining balaod, obligado ang mga media organizations nga magbaton og Filipino Sign language interpreter insets sa mga news ug public affairs programs sa broadcast o online news video. (ecb/PIA7-Bohol)