Balaod nga magsumpo sa pagdaghan sa mga

kaso sa HIV/AIDS, gilagdaan na ni Duterte

MANILA, Jan. 10 (PIA)--Gilagdaan na isip hingpit nga balaod ang Philippine HIV and AIDS Policy Act ni Presidente Rodrigo Duterte.

Nahisulod sa maong balaod ang mga polisiya kalabot sa pagsumpo sa pagdaghan sa mga natakdan og HIV/AIDS sa atong nasod.

Matud pa ni Presidential Spokesman Atty. Salvador Panelo, gi-amyendahan niining bag-ong balaod ang Philippine AIDS Prevention and Control Act of 1998 tungod kay kinahanglang bag-ohon ang istratehiya kalabot sa problema sa pagdaghan sa mga natakdan og HIV/AIDS sa Pilipinas.

Tuyo usab niining mapalapdan ang kasangkaran sa paghatag og kasayoran kun unsaon paglikay kining makatakod nga sakit apil na usab ang pagtabang sa mga natakdan na niini.

Gi-endorsar usab sa bag-ong balaod ang pagpalig-on sa katungod sa mga indibidwal nga natakdan na og HIV/AIDs.

Base sa talaan sa Department of Health (DOH), nadugangan og 8,533 ang gidaghanon sa mga natakdan og HIV sa nasod gikan lamang Enero hangtod Setyembre sa niaging tuig.

Matud pa sa DOH nga sa maong gidaghanon, nagpasabot nga adunay 32 ka bag-ong mga kaso sa HIV infection ang natala sa nasod matag adlaw.

Kun dili kini masugpo, maule sa AIDS ang maong impeksyon nga mag-resulta sa kamatayon sa natakdan niini.

Dungan niini, gidayeg sa Malakanyang ang mga magbabalaod nga nagduso aron mapalabang ang maong balaodnon nga motubag sa problema sa HIV/AIDS sa Pilipinas. (ecb/PIA7-Bohol)