City College di kompetensya sa

Mga pribadong mga kolehiyo 

TAGBILARAN CITY, Bohol, January 10 (PIA)—Sa gikataho nga pagbabag kuno sa mga pribado nga tunghaan dinhi sa Tagbilaran sa laraw sa pagbukas unya sa Tagbilaran City College, gipatin-aw sa mayor sa syudad nga wala’y angay nga kahadlokan ang mga tag-iyaha’g tunghaan dinhi. 

Gani, didto sa tinuyo nga Kapihan sa PIA nga didto mismo sa buhatan sa Mayor sa Dakbayan, gibutyag ni City Mayor John Geesnell Yap II nga ila na nga gikapasabut sa mga administrador ug tag-iyahag mga tunghaan nga pribado sa syudad nga dili angay nga mahadlok pagbukas sa pangpubliko nga tunghaan sa Tagbilaran. 

Matud ni Yap nga iya nga gikapasalig nga ang Tagbilaran City College, inig bukas niini, dili mokompetensya sa mga pribadong tunghaan. 

“Dili kita magtanyag sa mga kurso nga gitanyag na sa mga pribadong tunghaan, gawas sa pagpalig-on sa turismo ug usab sa industriya [sa turismo] sa syudad, saysay ni Yap didto sa Kapihan. 

Mga kurso nga magpalig-on sa mga trabahante sa syudad, ug pagpuno sa kasamtangan nga inventory sa mga blue collar nga trabahante ang gitan-aw karon nga mga kurso nga itanyag sa magbukas nga tunghaan sa kolehiyo sa Tagbilaran. 

Ang pagpaambit sa laraw sa syudad nga magbukas og kaugalingon nga pangpubliko nga tunghaan, gihangop usab sa mga katawhan nga misalig nga ang tunghaan sa kolehiyo nga iya sa Tagbilaran, magbukas sa usa ka tunghaan nga may maayo nga kalidad sa libre nga edukasyon. 

Ug inay mahadlok tungod kay makuhaan ang pundo sa panudlanan sa syudad sa pagpatukod sa kolehiyo ug pagpadagan sa serbisyo niini, may gisaysay pa nga dugang maayong balita nga dala sa ilang laraw nga libreng serbisyo sa edukasyon sa Tagbilaran. 

“Sa pagpahibaw nato sa Commission on Higher Education sa laraw sa pagbukas sa bag-ong publiko nga kolehiyo, gipasaligan kita nga may pundo usab ang CHED nga suporta alang niini,” paambit sa batan-on nga mayor. 

“Abi man nato og gasto lang ang pagbukas sa kolehiyo, may makwarta pa man diay hinuon ang syudad gikan sa CHED,” malipayon nga gisulti ni Yap. 

Dungan usab niini, gidoble na gikan sa P5,000 ngadto na sa P10,000 ang abag sa syudad alang sa kapin sa 500 na ka scholars nga gigastohan sa syudad ug kasamtangan nga nangungha sa mga pribado ug pangpublikong kolehiyo dinhi. 

Ug aron pag-aghat sa kadaghanan nga mga kabataan nga magkugi sa pagtungha, gianunsyo sa mayor nga sugdan na usab sa syudad niining tuiga ang pagpamutang og air conditioning units sa mga pangpubliko nga tunghaan sa elementarya. 

“Mahimong dili pa nato malukop og butang og aircon ang tanan nga tunghaang pangpubliko nga elementarya sa Tagbilaran, apan wala’y duda nga kasugdan na kini niining tuig,” saysay ni Yap. 

Kahinumduman nga ang tanan nga mga tunghaan sa Day Care sa syudad, kompeto na sa pagpa-aircon, taho sa kagamhanan sa syudad. 

Gipatukod na usab sa syudad sa matag tunghaan nga publiko, ang mga multi-purpose nga giaptan nga courts nga magamit dili lang sa tunghaan ug sa mga kalihukan niini, apan usab sa mga pangpublikong tapok ug temporary nga kapabalhinan sa mga apektado sa mga katalagman, pasabut sa mayor. (rahc/PIA-7/Bohol)