BFAR-7 – luwas ra mokaon og isda

TAGBILARAN CITY, January 21 (PIA)--Gipahibalo sa Bureau of Fisheries and Aquatic  Resources (BFAR)-Central Visayas ngadto sa publiko nga pwede ra mukaon og isda ug uban pang mga pagkaon gikan sa  dagat kay luwas ra kining kaonon apan lutoon lang og maayo.

Ang buhatan nipagawas og advisory human nikatap karon sa social media nga gidili una ang pagkaon og isda sa rehiyon tungod sa mga medical waste nga napalgan sa baybayon sa Mactan Channel sa Sugbo nga posibleng nagdala sa virus nga HIV. 

Matud pa sa BFAR nga usa ka sayop nga impormasyon ug walay igong basehan ang maong post gikan sa social media.

Base sa advisory nga gipagawas sa buhatan, dili mukaon og rubber ug plastic ang mga isda hinungdan nga layo ang posibilidad kon pananglitan adunay dugo ang medical waste nga nakaplagan sa baybayon.

Una na usab nipasidaan ang Department of Health (DOH)-Central Visayas nga mamahimong mapasakaan og kaso kining mga nanag-iya og social media accounts nga nagpakatap niining sayop nga impormasyon kabahin sa HIV.

Dugang niini nga aduna'y probisyon sa bag-ong balaod sa Republic Act 11166 o ang Philippine HIV and Aids Policy Act nga mamahimong mabilanggo ang magpataka og pakatap sa social media kabahin sa sayop nga impormasyon sa HIV.

Subay sa Section 22 sa maong balaod o ang "Misinformation on HIV and Aids," mamahimo nga mabilanggo gikan sa usa ka tuig hangtod 10 ka tuig ang mapamatud-an nga nakalapas niini ingon man mag-multa og gikan P50,000 o di moubos sa P500,000.

Gawas niini, gitataw sa buhatan nga dili makuha ang sakit nga HIV pinaagi sa pagkaon.

Giingong dili usab makalangoy ang virus tungod kay dili kini maka-survive o mabuhi gawas sa lawas. (ecb/PIA7-Bohol)