“Pagdaginot sa enerhiya,” 

lusot na sa Bicam komite 

TAGBILARAN CITY, Bohol, January 21 (PIA)—Sa kadako sa potensyal sa pagdaginot sa enerhiya pinaagi sa paghimo nga institusyon sa walay usik nga paggamit niini, giisip sa Department of Energy (DOE) nga higante nga lakang ang pagpasa sa Bicameral Conference Committee Hearing sa Energy Efficiency and Conservation (EE&C) Act didto sa Senado, niadtong Enero 16, 2019. 

Ang pagpasa nahimong makasaysayon sanglit kini nga balodnon unang gisangat sa ika walo nga Kongreso niadtong 1988, ug sukad ma sukad, igo ra gyud nga mahibalik og sang-at sa sunod nga Kongreso kay dili mahatagan og gibug-aton. 

Sa labing bag-o nga mga katikaran, ang hisgutanan sa pagdaginot sa enerhiya init ug walay ineresado nga magbabalaod nga mohikap sanglit aduna kini dako nga epekto sa pagsalig sa enerhiya nga kasagaran gikan sa pamuhunan sa mga sapi-an. 

Apan, gikan sa panglantaw sa palisiya, ang pagpatuman sa energy efficiency and conservation dako og maabut kon manguna nga himoon alang sa sector sa mga panimalay. 

Kini maoy usa sa pipila ka rason nga ang residential sector nahimo nga usa sa labing maayo nga target sa mga palisiya sa pagdaginot sa enerhiya sanglit kini usab nga sector ang usa sa labing dako nga konsumidor sa enerhiya. 

Dinhi na nakita ang dako nga bili sa pagpatuman pinaagi sa balaod sa EEC. 

Dinhi sa Pilipinas, ang EEC Act nagtumong sa paghimo og sumbanan sa nga lakang sa pagbansay sa energy efficiency ug sa mga lakang pagdaginot pinaagi sa pagpahimong balaod sa paggamit sa mga teknolohiya nga magdaginot sa koryente ug enerhiya ilabi na sa mga pagtukod og gambalay o buildings. 

Niini, ang EEC Act nagalatid na sa Local Energy Efficiency and Conservation Plan, gawas pa sa pagpasukip na sa Energy Conserving Design sa mga Buildings sa dili pa kahatagan og building permits ang magtukod. 

Dungan usab niini ang pag-umol sa Interagency Energy Efficiency and Conservation Committee alang sa pagpatuman sa Government Energy Management Program (GEMP), nga magtumong sa pagpakunhod sa konsumo sa elektrisidad ug tubil sa mga ahensya ug buhatan sa kagamhanan. 

Tungod niini, mipadayag si Energy Secretary Alfonso G. Cusi sa iyang kahinam. 

Matud niya, dako ang ilang kalipay sa pagsugat sa dugay na nga gipaabut nga kadaugan nga mingdungan usab sa unang buwan sa 2019. Dugay na ang DOE nga nagpaabut sa pagpasa niining nahisgutang nga balaod. 

Dako ang atong pasalamat sa suporta nga atong nakuha sa duh aka balay balaoranan, ug karon, nia na sa DOE ang pagpatuman sa balaod, samtang ato nga gilantaw ang mas lapad nga nataran sa pagpatuman sa walay usik nga enerhiya, butyag ni Cusi. 

Ang paglagda gitambongan nila ni Senator Sherwin Gatchalian, Chairperson sa Senate Committee on Energy ug Chairperson sa House Committee on Energy, nga si Congressman Lord Allan Velasco, samtang kini gisaksihan sa mga opisyal sa DOE. (rahc/PIA-7/Bohol)