Mas kusog nga data, 

Video sa Smart LTE-A 

TAGBILARAN CITY, Bohol, January 21 (PIA)—Kon nakabantay kamo nga may kausaban sa mobile data ug video streaming alang sa Smart users, kana dala lamang sa gipakusgan pa gayud nga teknolohiya sa paghatag sa mas paspas nga mobile data ug video streaming. 

Segun sa PLDT ug ang wireless arm niini nga Smart Communications, Inc. (Smart) kini dala sa gihingusgan nga Long Term Evolution-Advanced (LTE-A) technology nga nagpa-uso sa carrier aggregation technology sa iyang network. 

Kini, matud pa sa Smart, aron paugmaron pa ang kasinati-an sa mga Bol-anon sa mobile internet nga hatud sa Smart, Sun ug TNT customers. 

Ang LTE ug ang bag-o nga LTE-A maoy kasamtangan nga labing maayong teknolohiya nga tanyag alang sa mobile data, segun sa mga eksperto. 

Sa LTE-A, gihimo niini ang paglumpong sa duha ngadto na sa lima ka mga carriers o radion frequency bands aron makahatag sa mas paspas nga kakusgon sa data ngadto sa mga tiggamit sa mobile phones. 

Sa natad sa telecommunication, ang LTE usa sumbanan alang sa high speed nga wireless nga komunikasyon alang sa mga mobile phines ug data terminals pinasikad usab sa mga bag-ong teknolohiya sama sa Global System for Mobile Communications (GSM) nga may 14.4kilobits per second (kbps) matag segundo, Enhanced Data Rate for GSM Evolution (EDGE) nga may 217.6 kbps, Universal Mobile Telecommunications Service nga may 384 kbps ngadto na sa 4th generation (4G) LTE nga may 100Mbps nga download speed ug 50 mbps nga upload speed. 

Ang LTE-A sa Smart, kaya na nga makadownload og 1 gbps ug 500mbps nga upload speed. 

Sa mga lugar nga may LTE sa nasud, 71% na usab ang may LTE-A, samtang, epektibo na sa Metro Manila ang 5CC. 

Sa mga dagko nga syudad sa nasud, apil ang Tagbilaran sa mga lugar nga naggamit na sa 3CC sama sa Paoay sa Ilocos Norte, Baguio sa Benguet, San Fernando sa Pampanga, Calamba sa Laguna, Antipolo sa Rizal, Puerto Princesa sa Palawan, Naga sa Camarines Sur, San Jose sa Antique, Bacolod sa Negros Occidental, Lapu-Lapu sa Cebu, Ormoc sa Leyte, Dipolog sa Zamboanga del Norte, Koronadal sa South Cotabato ug Davao City. 

Sa katapusan nga ihap, ang ihap sa base station sa Smart LTE miuswag na sa 65% ngadto sa 14,400 sa unang tulo ka buwan sa 2018, samtang ang 3G base stations miidaghan usab sa 11,000 hangtud niadtong Septembre 2018. 

Sa lain nga bahin, ang PLDT’s fiber optic transmission ug distribution network, mao na ang labing lapad sa nasud sa 221,000 kilometros. 

Ang fiber optic nagsuporta sa Smart mobile network sa paghatag sa high-capacity fiber connections alang sa LTE base stations niini. 

Gawas sa carrier aggregation, napahimutang na usab sa Smart ang 4x4 Multiple Input, Multiple Output (MIMO) ug 256 Quadrature Amplitude Modulation (QAM) technologies sa Metro Manila. 

“Padayon kita nga nag-ugmad sa atong network aron makahatag kita og world-class mobile internet connectivity alang sa atong mga customers sa tibuok nasud,” matud ni Mario G. Tamayo, PLDT-Smart senior vice president for network planning and engineering. 

Kini nga mga padayon nga pag-ugmad sa network agi og tubag sa nagkadaku nga panginahanglan sa mobile data ugang nagkakusog nga kauhaw alang sa video sa mga Pinoy, segun pa sa Smart. 

Alang sa mga Bol-anon, nga daghan ang mga nanarbaho tua sa gawas, ang mas daghan nga video streaming maggahum sa mga banay nga ika-estorya sa videocall ang ilang mga mahal sa kinabuhi, o ika chat pinaagi sa chat apps gawas nga mapalig-on pa usab niini ang mga negosyo nag nia dinhi. (rahc/PIA-7/Bohol)