Panawagan sa DOH sa publiko:

ihunong ang pagpakatap sa video ni Velasco

TAGBILARAN CITY, January 18 (PIA)--Nanawagan na ang Department of Health (DOH) sa publiko nga ihunong ang pagpakatap sa video sa Razorback drummer nga si Brian Velasco.

Sa usa  ka opisyal nga pahayag nga gipagawas sa buhatan kagahapon, Enero 17, gipadala sa DOH ang ilang pahasubo sa pamilya ni Velasco nga namatay human naghikog niadtong Miyerkules sa buntag.

Gitumbok sa DOH nga angay ihunong na ang pagpakatap sa video ni Velasco isip pagrespeto sa pamilya niini nga nagbangotan karon.

Gikuhaan og live video ni Velasco ang kaugalingon sa wala pa mi-ambak gikan sa rooftop sa usa  ka building sa Malate, Manila.

Matud pa sa DOH, ang depresyon usa  ka seryosong health condition nga nanginahanglan og tabang.

Base sa datos sa buhatan, naa sa 3.3 milyong Pilipino ang nakasinati og mga sakit nga may kalabotan sa depresyon.

Giingong mokabat sa 2.5 ka lalaki ug 1.7 ka babaye sa matag 100,000 ang suicide rare sa Pilipinas.

Gitumbok sa DOH nga angay nang hisgotan ang depresyon aron maundang ang stigma kalabot sa mental health tungod kay kun mapasagdan, mahimo kining magresulta sa paghikog.

Gibutyag sa buhatan nga kun adunay problema o may gustong ikaestorya, adunay Hopeline hotlines nga mahimong tawgan.

Kini ang 804-HOPE (4673); 0917-558-HOPE (4673); o 2919 (toll-free number alang sa Globe ug TM subscribers). (ecb/PIA7-Bohol)