Mock election, ipahigayon

sa 2 ka lungsod sa Bohol

TAGBILARAN CITY, January 18 (PIA)--Ang Commission on Elections (Comelec) gitakdang mopahigayon og mock election sa duha ka lungsod sa unang distrito ning lalawigan sa Bohol.

Tuyo niining masulayan ang proseso sa eleksyon ug ang mga bag-ong ekipo aron mahimong pulido na ang tanan alang sa piniliay sa umaabot Mayo ning tuig.

Sigun pa sa bag-ong Comelec supervisor sa Bohol nga si Atty. Eddie Aba, ang ulohang buhatan nila nipili sa Alburquerque Central Elementary School sa lungsod sa Alburquerque ug sa Barangay Poblacion ug Malayo Norte sa lungsod sa Cortes isip mga testing sites.

Ang duha ka nahisgotang lungsod apil sa 60 ka testing areas nga napili sa Comelec sa tibuok nasod.

Matud pa ni Aba nga kinatibuk-ang 100 ka botante apil na sa mga persons with disability ug senior citizens ang mosalmot niining pagbansay nga magsugod sa alas 6 sa buntag ugmang adlawa, Sabado (Enero 19).

Ang Comelec mogamit sa mga vote counting machines sa tabang sa mga Board of Election Inspectors (BEIs).

“Usa niini masulayan kun ang balota nga may buslot dawaton o i-apil ba og ihap sa makina,” matud pa ni Aba.

Pinaagi niini, masulayan ang proseso sa eleksyon sama sa transmisyon sa resulta ngadto sa ulohang buhatan sa Comelec ug ang pag-ila sa botante gamit ang Voter Registration Verification System o biometrics.

Gamit ang fingerprints o tamla, ma-ilhan dayon ang botante pinaagi sa ilang biometrics ug hulagway.

Ipahigayon usab ang manual voting o mano-mano nga pagbotar dungan sa automated voting aron matandi ang resulta, nga ginahimo na kaniadto sa mga niaging mock elections.

Sa mock eleksyon, ipasulay sa mga botante ang gikan sa pagshade o pagpili sa mga ibotar nga kandidato hangtod sa paghungit sa balota ngadto sa vote counting machines. (ecb/PIA7-Bohol)