Mga magtutudlo, gipalikay sa mga

kalihokang politikal karong eleksyon

TAGBILARAN CITY, January 17 (PIA)--Gipahinumdoman ni Department of Education (DepEd) Kalihim Leonor Briones ang mga magtutudlo ug mga non-teaching personnel niini kalabot sa paglikay sa mga kalihokang politikal dungan sa nagsingabot nga midterm eleksyon sa nasod.

Matud pa ni Briones, gidili ubos sa Civil Service Law ang pag-apil sa mga magtutudlo ug mga empleyado sa mga aktibidad sa mga politiko ug uban pang may kalambigitan sa eleksyon.

Ubos usab sa DepEd Order No. 48, gidili sa mga magtutudlo ang paghimo sa mga mosunod: pagmugna og organisasyon o grupo nga manguha og boto; magkomento, modiskurso, anunsiyo batok sa usa  ka kandidato; ug ang magpakatap og bisan unsang kasulatan o materyales nga nagsuporta o nagsaway sa bisan kinsang kandidato.

Gidili usab ang pagdawat og kontribusyon nga may tumong politikal; magsul-ob og election paraphernalia; mahimong watcher sa bisan kinsang kandidato sa eleksiyon; ug mogamit og pondo o kahimanan sa gobyerno alang sa politikal nga tumong.

Dugang pa sa DepEd, dili usab mahimong gamiton ang posisyon aron mang-impluwensiya og mga tawo ug magtutudlo nga nagsuporta og usa  ka kandidato.

Apan gitin-aw usab ni Briones nga wala did-i sa buhatan ang mga magtutudlo ug empleyado nga magpadayag sa ilang gibati ug pagtuo kalabot sa eleksyon.  (ecb/PIA7-Bohol)