Birth certificate, di na kinahanglan sa passport renewal 

TAGBILARAN CITY, January 31 (PIA)--Gitangtang na sa Department of Foreign Affairs (DFA) ang pag-presenta sa birth certificate sa mga mag-renew sa ilang passport. 

Nahisulod kini sa Department Order No. 03-2019 nga gipagawas ni DFA Kalihim Teodoro Locsin Jr. 

Nakalatid sa maong kamanduan ang pagbaton og daling pamaagi alang sa mga mag-renew sa ilang pasaporte. 

Apan gitataw sa maong kamanduan nga kinahanglan pa gihapon ang birth certificate alang sa mga first-time passport applications, renewal application sa mga nawala ug nagising pasaporte, renewal applications sa pagpa-usab sa mga passport entries ug renewal applications sa old brown ug green passports nga nagsulod og kumpletong middle name ug kun ang aplikante naa sa watchlist sa DFA. 

Una niini, gibutyag ni Locsin nga ang daang contractor sa DFA nga Oberthur Technologies nidala sa tanang passport data mao nga unang nataho nga kinahanglan ang birth certificate sa mga magpa-renew sa ilang pasaporte. 

Apan gipasabot ning bag-o lang sa Kalihim nga wala gidala sa daang contractor ang data sa passport holders apan dili lang kini mapasulod. 

Giingong nahimoan raman kini og paagi sa kasamtangang contractor nga APO Production Unit apan matud pa ang pipila ka mga datos corrupted na. 

Samtang gihimakak na sa Apo Production Unit nga nikuha kini og sub-contractor. 

Gipasabot na ni Apo Production Unit Incorporated Chairperson Michael Dalumpines nga dili sub-contractor, kundi finance partner niini ang United Graphics Expression Corporation o UGEK. 

Gitugyan na sa DFA sa Senado ang pagsuta kun unsa ang tinuod niini. (ecb/PIA7-Bohol)