Bohol may bag-ong 

prov’l police director 

TAGBILARAN CITY, January 14 (PIA)--May bag-o nang provincial police director ang lalawigan sa Bohol human sa gipahigayong change of command sa Bohol Provincial Police Office (BPPO) niadtong Biyernes didto sa Camp Francisco Dagohoy Headquarters, ning syudad. 

Pormal nang gitugyan ni Senior Supt. Angeles Geñorga Jr. ang pagdumala sa BPPO kang Senior Supt. Julius Cesar Gornez. 

Si Gornez ang kanhi chief of investigation sa Police Regional Office (PRO) 7 Investigation and Detective Management Division (IDMD) ug nahimo usab nga Tagbilaran City police chief kaniadto. 

Sa laing bahin, si Geñorga nga mi-alagad sa BPPO sulod sa 11 ka buwan ang mihulip usab kang Gornez isip IDMD chief. 

Ang bag-ong BPPO chief mipasalig nga iyang ipadayon ang giyera kontra illegal nga droga, kriminalidad ug korapsiyon. 

Gi-awhag usab ni Gornez ang mga kapolisan sa lalawigan nga himuong mas luwas nga puy-an ang Bohol ug himuon kining drug-free nga probinsiya. 

“I will commit to support relevant ideas in improving our service,” matud pa ni Gornez atol sa iyang pagka-instalar isip bag-ong provincial director sa BPPO niadtong Biyernes nga gipangunahan ni Senior Supt. Angelito Dumangeng, deputy regional director for operation isip representante ni PRO 7 Director Chief Superintendent Debold Sinas. 

Una nang gipamahayag ni Sinas nga ang umaabot nga eleksiyon ang hinungdan sa pagkabalhin ni Geñorga. (ecb/PIA7-Bohol) 

Atol sa gipahigayong change of command niadtong Biyernes sa Camp Francisco Dagohoy Headquarters, syudad sa Tagbilaran, pormal nga gitugyan ni PSSupt. Geñorga kang PSSupt. Cesar Gornez ang pagdumala sa BPPO. (ecb/PIA7-Bohol)