Mga empleyado, mahimo 

nang magtrabaho sa balay 

TAGBILARAN CITY, Jan. 11 (PIA)--Gilagdaan na ni Presidente Rodrigo Duterte ang Republic Act 11165 o ang “The Telecommuting Act”. 

Gitugotan niining bag-ong balaod ang pag-trabaho sa balay sa pipila ka empleyado gamit ang telecommunication o computer technology. 

Apan kini mag-base sa mahimong kasabotan sa employer ug sa iyang empleyado. 

Base sa bag-ong balaod, kinahanglang nakabutang sa ‘mutual agreement’ o kasabotan ang detalye sa pila ka oras nga pag-trabaho, overtime, rest days, ug uban pang mga benepisyo sama ra usab sa usa ka regular nga empleyado nga tigsulod sa opisina matag adlaw. 

Gihatagan usab sa Telecommuting Act og susama nga katungod ang usa ka nag-trabaho sa balay ug ang regular nga empleyado. 

Nahisulod usab dinhi ang dugang nga suholan kun mag-trabaho ang usa ka empleyado sa oras sa iyang rest day apil na usab sa panahon sa legal ug regular holidays. 

Gimanduan niining balaod ang Department of Labor and Employment (DOLE) sa pagdumala sa usa ka telecommuting pilot program sa ilang industriya sulod sa tulo ka tuig. 

Angay usab nga magbaton og regular nga baselining, scoping ug profiling sa research work nga maoy gamiton sa evaluation aron mahibaw-an ang gahom sa maong balaod. 

Tuyo sa “work-from-home law” nga makuhaan ang gidaghanon sa mga tawo sa kadalanan matag ‘rush hours’ ug magbaton og igo nga ‘quality time’ nga igahin sa usa ka partikular nga trabaho. 

Nagtuo ang mga nagsulat niining balaod nga mahimong mas produktibo ang output sa usa ka empleyado kun dili mahurot ang iyang oras sa pag-byahe paingon ug pagpaule gikan sa trabaho. (ecb/PIA7-Bohol)