Geñorga, gipasidunggan 

sa PPOC, PADAC 

TAGBILARAN CITY, Jan. 11 (PIA)--Sa gipahigayon nga hiniusang Provincial Peace and Order Council (PPOC) ug Provincial Anti-Drug Abuse Council (PADAC) Meeting, gipasidunggan si Provincial Director PSSupt. Angeles Geñorga Jr. sa iyang sulundon nga buhat nga nagdala sa lalawigan sa Bohol isip ‘top Philippine National Police (PNP) in the region’ ug ang pag-ila sa probinsya sa Bohol isip modelo sa anti-drug abuse program sa tibuok nasod. 

Sa gihimong tigom sa joint PPOC ug PADAC meeting nga gipangunahan ni Gob. Edgar Chatto karong adlawa, mipalabang ang grupo og usa ka resolusyon nga gi-uyonan sa tanan nga nagpasidunggog kang Provincial Director PSSupt. Angeles Geñorga Jr. sa iyang sulundon nga buhat sa pagseguro sa kahusay ug kalinaw nga nakatabang sa paglambo sa lalawigan sa Bohol. 

Sa maong tigom nga gipahigayon sa Governor’s Mansion ning syudad sa Tagbilaran, nihatag usab sa iyang mensahe si Geñorga diin nagpasalamat kini sa talagsaong oportunidad sa pag-alagad sa mga Bol-anon ug sa tanang dumuduaw nga nibisita sa Bohol. 

Sulod sa usa ka tuig nga pagdala ni Geñorga sa Bohol PNP, masangpotanon nga napakunhod niini ang crime volume. 

Sa iyang pagdumala, napakunhod niini ang crime rate ngadto sa 31%. Ang iya usab nga management strategy nagpatugbaw sa suporta sa mga stakeholder sa aspeto sa kamaayo sa crime prevention, solution and efficiency, ug lakip na usab ang pagpalambo sa takos ug organisadong polis ug sa pag-mobilisar sa pinansiyal ug logistikal nga kahinguhaan. 

Gawas sa pasidunggog ug plake nga nadawat gikan sa PPOC ug PADAC, gihatagan usab si Geñorga og plaque of appreciation gikan sa Bohol Chamber of Commerce and Industry (BCCI), Bohol Association of Hotels Resorts and Restaurants (BAHRR) ug gikan sa Countryside Development Program Purok Power Movement . (ecb/PIA7-Bohol) 

Gidawat ni Provincial Director PSSupt. Angeles Geñorga Jr. gikan kang Gob. Edgar Chatto ang plake isip pasidunggog sa PPOC ug PADAC sa iyang sulundon nga buhat sa pagseguro sa kahusay ug kalinaw nga nakatabang sa paglambo sa lalawigan sa Bohol. (ecb/PIA7-Bohol)