PNP, nipahinumdom sa mga katungod 

sa mga motorista sa mga checkpoints 

TAGBILARAN CITY, January 14 (PIA)--Opisyal nang nagsugod ang election period, upat ka buwan sa dili pa ang adlaw sa piniliay. 

Alas 12 gahapon sa tungang-gabii sa dihang gipatuman sa Commission on Elections (Comelec) ang gun ban dungan sa pagbutang og mga checkpoint sa nagkalain-laing lugar sa tibuok nasod, katambayayong ang Philippine National Police (PNP). 

Tungod niini, nagpahinumdom ang PNP sa publiko kalabot sa ilang katungod sa mga checkpoint nga gipahigayon sa mga kapolisan. 

Matud pa sa PNP nga magpahigayon lamang og visual search ang mga polis sa mga checkpoint. 

Giingong dili mahimong kapkapan sa mga polis ang drayber o pasahero ug dili usab kinahanglang mogawas sa sakyanan o ablihan ang sakyanan ug compartment niini. 

Magpahigayon lang og physical inspection kun madiskubre sa mga polis ang bisan unsang kontrabando sa sulod sa sakyanan. 

Apan ang mga motorista nga makuhaan og bisan unsang armas, eksplosibo, mga hinagiban ug ilegal nga droga sa checkpoints, ipaubos sa imbestigasyon ug posibleng ma-aresto. 

Gipahibalo usab sa pamunoan sa PNP nga angay himuon ang checkpoints sa mga hayag nga lugar ug komunidad samtang nakasuot og uniporme ang mga polis. 

Gawas niini, angay usab nga may tarong nga marka sa mga lugar ug nakabutang usab ang pangalan ug contact details sa election officers sa ilang lugar aron mahibaw-an sa publiko. 

Kun may masugatang problema kalabot sa checkpoint operations, mahimong tawagan ang lokal nga PNP o ang national hotline number nga 911 o mahimo usab mo-reklamo sa opisyal facebook account sa PNP. (ecb/PIA7-Bohol)