SEC, subling nipasidaan batok

sa pag-invest sa ‘Paysbook’

TAGBILARAN CITY, January 15 (PIA)--Subling nipasidaan ang Securities and Exchange Commission (SEC) sa publiko kalabot sa pag-invest o pamuhunan sa Paysbook E-Commerce System Corporation.

Base sa advisory nga gipagawas sa SEC Enforcement and Investor Protection Department, nakadawat sila og impormasyon nga ang Paysbook nag-post og mga hulagway sa social media nga ang ilang mga opisyal giingong miadto na sa komisyon aron ipahibalo sa publiko nga nasulbad na ang mga isyu niini.

Kini taliwala sa pasidaan sa SEC batok sa Paysbook nga gipagawas niadtong Agosto 1, 2018.

Pagtataw pa sa SEC, wala nila gilibkas ang advisory batok sa Paysbook tungod kay wala sila’y igong basehan nga tanggalon kini.

Ubos sa Paysbook, ang investor kinahanglang mohimo og account diin mokita siya dayon og P300.00.

Ang activation code niini nagkantidad og P1,000 nga maghatag sa investor og kita nga mokabat sa P1,200 matag unom ka adlaw alang sa log-in ug log-out rewards.

Magbaton usab og komisyon ang investor nga mokabat sa P40,000 kun maka-recruit og mga bag-ong miyembro.

Matud pa sa SEC nga ang Paysbook usa  ka rehistradong korporasyon nga ang nag-unang tumong mao ang e-commerce system services, online selling, online advertising services, franchises business, website development ug customized online system development.

Apan gitataw sa komisyon nga bisan rehistradong kumpanya kini, wala kini lisensya aron mag-solicit og investment o puhunan gikan sa publiko.

Ang mga mapamatud-ang salesman, brokers, dealers o ahente niini mahimong mapahamtangan og multa nga mokabat sa P5 milyon o pagkabilanggo og hangtod sa 21 ka tuig.

Ang mga pangalan usab sa mga tawo nga nalambigit niining scheme ipasa ngadto sa Bureau of Internal Revenue (BIR) aron ma-ases ang ilang buhisan ug penalidad. (ecb/PIA7-Bohol)