DOE: “Energy-efficient lifestyle”

himoon’g new year’s resolution 

TAGBILARAN CITY, Bohol January 9, (PIA)—Gipanawagan sa Department of Energy (DOE) ang pagsagop sa napili nga slogan alang sa pagdaginot ug isip new years resolution sa 2018. 

Kini samtang gilusab sa DOE ang “Save Save Save,” isip binuksan nga mantra sa DOE ngadto sa tanan nga Pinoy nga konsumidor samtang nagsugod ang tuig. 

Tambag ni DOE Secretary Alfonso G. Cusi ngadto sa mga Pinoy, aron makatigum alang sa 2018, hangpon ang energy efficient lifestyle. 

Didto gipasabut usab ni Cusi ang kampanya nga “E-Power Mo.” 

Matud niya, kini nagpahinumdom sa tanan nga may Energy Ability sila ug ang paghangop sa energy efficient lifestyle magpalig-on sa atong mga banay ug sa nasud na usab. 

Subay niini, giduso sa kalihim ang 10 ka yano nga New Year’s resolutions nga magtanyag sa tanan, sa electricity ug fuel efficiency. 

Una, matud ni Cusi, kon mabatasan nga mamawong sa suga nga wala gamita, ang us aka bombelya nga wala magsiga sa lima ka oras, makapadaginot na og 2.1 ka kilowatt matag oras o labing menos 21.00 matag buwan. 

Ika duha, kon mahimong kinaiya ang pag-igot sa saksakan saw ala gamita nga kahimanan nga electric, mapapas niini ang “phantom load” o ang masayang nga enerhiya nga gigamit sa mga appliances nga nakasaksak apan wala ganita. 

Pananglitan, ang karaan nga CRT television, may gihuptan nga 8 watts standby power unya kon gubayan pa sa cable o digital box nga may lain usab nga 8 watts standby power, sa kinatibuk-an, 16 ka watts sa phantom load o katumbas sa PhP57.60 ang gibayad sa koryente nga nasayang matag buwan. 

Ang paggamit sa Light Emitting Diode (LED) lighting system makapadaginot sa labing menos 86% nga enerhiya kon kini ipuli sa incandescent bulb o 50% nga matigum gikan sa compact fluorescent lamp paingon sa LED. 

Usa sa dako og ikatampo usab sa pagdaginot mao ang regular nga pagpanglimpyo sa mga appliances o kagamitan nga elektrikal. 

Pananglitan kon ang air-conditioners ug refrigerator may hugaw nga filter ug condenser, sa us aka horsepower nga regular nga aircon, PhP96.00 ang matigum sa us aka buwan sa 8 ka oras nga andar niini. 

Sa refrigerator, makatigum og bali og 13.5 ka kilowatt hour kon kini limpyo ug dili sobra ang load. 

Gani, tambag sa DOE, makadaginot pa usab kon sa dili pa magluto, ipabalik una sa normal nga temperature ang karne nga gipakaging kay kini makapagasto sa gasul o elektrisidad kon mag luto na. 

Pagsagop usab sa praktikal nga mga butang, aghat sa DOE. Kon init ang adlaw o hayag, nan ablihi ang bintana ug pawnga ang suga. Gani, kon nag-init ang adlaw, unsa pa may kinahanglan nga ispindry ang ug initon ang linabhan aron mauga nga mahimo man nga ihayhay na lang, pahinumdom sa DOE. (rahc/PIA-7/Bohol)