DOE mipahinumdom

pagdaginot sa gitubil

TAGBILARAN CITY, Bohol January 7 (PIA)—Kon buot ka nga makadaginot sa tubil, tangtanga ang mga walay gamit nga accessories sa imong sakyanan sama sa ski-rack sa atup, bike rack ug uban pang gidugang nga makaapekto sa streamlined nga desinyo sa imong sakyanan.

Ug kon wala gikinahanglana, idiskarga ang mga nagpabug-at sa sakyanan, kay ang dugang nga gibug-aton, dugang usab nga kahago sa makina nga mogamit sa gitubil, tumbok sa Department of Energy (DOE).

Ang mga ski rack, bike racks ug mga front grilles mas makapabug-at sa imong sakyanan tungod sa aerodynamic drag, hinungdan nga mogasto ka og dugang tubil alang niini, pahinumdom sa DOE samtang ilang gipadayon ang pagduso sa pagsagop sa kina-iya nga pagka energy-efficient sa mga Pinoy.

Gani, sa bag-o nga tuig, giaghat ni DOE Spokesperson ug Undersecretary Felix William B. Fuentebella ang katawhan sa pagbaton ug bag-o usab nga panglantaw sa pagdaginot sa enerhiya samtang sugaton ang bag-ong tuig.

Sa usa  ka press conference nga naglusad sa kampanya sa DOE nga Save, Save, Save, gitumbok sa departamento nga nagpahiluna sa pagpahimutang sa tinubdan sa enerhiya nga magpa-andar sa ekonomiya nga gikinahanglan na gayud ang ma-alamon nga pagpili sa sakto.

Dungan usab niini nga kampanya alang sa 2019, si Sec. Cusi mipaambit sa mga giya alang sa pagdaginot sa tubil.

Matud niya, ang pagmintinar sa gikusgon sa dagan sa sakyanan ilabi na sa dagan nga daan sa makina, makapadaginot na.

Pananglit, saysay niya, sa pagdagan sa 60-80 kilometros matag oras inay sa 120 kmph, may pagtuon nga mitala og 25% nga pag-usbaw sa madaginot nga tubil.

Dugang pa niya, dili maayo ang pagpataka og pagpuli-puli og tamak sa gasolinador ug sa brake.

Pagdaginot sa tubil pinaagi sa pagtantya diin ka dapita mohunong, matud niya.

May mga pagtuon na nga nagpakita nga ang mga sakyanan nga gipadagan sa 60 kph, mohunong pa sa gilay-on nga 650 metros nga dili kana magtamak pa sa sa brake, nga magpadaginot sa imong tubil.

Gisugyot usab sa DOE ang “Ang-cash Tipid” o ang pagambitay sa sakyanan (Carpooling Program).

Pinaagi sa carpooling, daghan ang mahimo nga mobyahe nga magdungan sa usa  ka pribado nga sakyanan, ug ila na lang bahinan ang pangtubil ug pulipulihan og maneho ang sakyanan paingon sa adto-an: magpamenos pa sa gasto, kakunhoran pa ang traffic.

Paapas pa usab sa DOE, pinaagi sa pagsakay sa pangpubliko nga sakyanan sama sa MRT ug LRT, gawas nga kamenosan na ang sakyanan nga maoy hinungdan sa grabe nga pagkabubod sa traffic sa karsada, kini magpasayon sa byahe sa uban nga mas nanginahanglan nga mogamit sa luag nga dalan.

Dala niini, aghat sa DOE, “Ato nga padayonon ang ‘Save Save Save’ pinaagi sa tukma nga pamaagi sa pagdaginot.”

Ang pag maximize sa atong energy ability, maghatag kanato sa kahigayunan nga mamahimong globally competitive ug kini magtugyan kanato sa bag-o nga ekonomikanhon nga kaugmaran sa nasud,” panapos ni Sec. Cusi. (rahc/PIA-7/Bohol)