Listahan sa mga VAT-exempted nga mga tambal,

gipagawas na sa DOH

TAGBILARAN CITY, Jan. 7 (PIA)--Gipagawas na sa gobyerno ang listahan sa mga value-added tax exempted nga mga tambal alang sa sakit nga diabetes, hypertension o high blood ug high cholesterol nga gisugdan og pagpatuman niadtong Enero 1.

Agi kini og pagsunod sa joint implementation sa Section 109-AA sa Republic Act 10693 sa Departments of Health (DOH), Department of Finance (DOF), Bureau of Internal Revenue (BIR) ug Food and Drugs Administration (FDA).

Ubos sa balaod, gitangtang ang 12 porsiyentong VAT sa mga “common maintenance medication” nga mandato sa Tax Reform for Acceleration and Inclusion Act o TRAIN law.

Apil sa mga VAT-exempt ang insulin alang sa mga adunay diabetes; atorvastatin, simvastatin ug rousavastatin alang sa adunay high cholesterol; captopril, enalapril ug fosinopril sodium alang sa mga adunay hypertension.

Gitambagan usab sa DOH ang publiko nga e-akses ang website nga   http://www.dpw.doh.gov.ph/VATExempted aron makita ang kinatibuk-ang listahan sa mga discounted nga tambal.

Kalabot niini, nanawagan usab si DOH Kalihim Francisco Duque III sa mga botika ug pharmaceutical company sa paghatag og diskwento sa mga tambal sa diabetes, hypertension ug high cholesterol.

Nipasidaan ang kalihim nga mapahamtangan og silot o mapasakaan og kaso ang mga botika o pharmaceutical company nga dili mosunod sa nahisgotang balaod. (ecb/PIA7-Bohol)