Mga tambal sa diabetes, hypertension ug high-cholesterol,

VAT-exempted na sugod karong tuiga

TAGBILARAN CITY, Jan. 7 (PIA)--Epektibo niadtong Enero 1, wala na pahamtangi og Value Added Tax (VAT) ang mga tambal alang sa diabetes, hypertension o high blood ug highcholesterol.

Kini ang gi-anunsiyo sa Department of Finance (DOF).

Tanang pasyente nga adunay reseta para tambal sa diabetes, hypertension ug high cholesterol ang mahimong makapahimos niining VAT exemption.

Sigun pa sa impormasyon nga gipakatap sa DOF, usa  sa mga probisyon ubos sa Tax Reform for Acceleration and Inclusion o TRAIN Law nga mahatagan ang katawhan og akses a healthcare ug mas baratong tambal.

Ang mga senior citizens ug Persons with Disabilities (PWDs) makadawat na og VAT exemption ug 20% diskwento base sa “Senior Citizen Act” ug “Magna Carta for Persons with Disabilities.”

Kining VAT exemption kauban sa TRAIN Law aron matabangan ang tanang adunay “common maintenance medications” sa sakit nga diabetes, hypertension ug high cholesterol.

Gitambagan sa DOF ang publiko nga mangayo gayud og resibo aron mahibaw-an kun ang napalit nga tambal alang sa mga nahisgotang sakit VAT-exempted na ba gayud.

Alang sa dugang kasayoran, mahimong mosulat ang publiko sa ecomplains@bir.gov.ph alang sa pag-avail og exemption ug sa pag-resibo; edpms@doh.gov.ph alang sa pag-reseta; ug info@fda.gov.ph alang sa bagbaligya sa mga botika, hospital pharmacies ug uban pang namaligya og tambal. (ecb/PIA7-Bohol)