GFNY naneguro nga ilikay

sa gibakbak nga agi-anan

TAGBILARAN CITY, Bohol, January 7 (PIA)—Samtang nangandam ang Bohol nga hangpon ang mga siklesta nga moapil sa international biking marathon nga Gran Fondo New York (GFNY) karong Enero 27, gipasalig sa mga tigpasiugda nga ilikay na kini sa mga ruta nga guba-on ug lisud agi-an.

Ug kon dili man kalikayan ang daut nga dalan nga karon gitrabaho pa, gibutyag sa mga organizers nga ila na nga gikasabut ang mga kontraktor nga unahon ang mga maagi-an ug kon dili man makaya, labing menos, pahamison aron sayon sa mga siklesta agi-an.

Gani, matud ni David Aliño local nga contact sa GFNY didto sa Kapihan sa PIA, uban sa mga local nga tinugyanan, gihangyo na nila nga mamaayo na ang mga agi-an sa ruta aron dili motagam ang mga moapil sa lumba.   

Kahinumduman nga ang mga tigpasiugda sa labing una nga GFNY sa Pilipinas, mipili sa Bohol, tungod sa maayong mga dalan niini ug may pakapin pa nga mga maayong talan-awon nga maagi-an ug mga katawhan nga mainiton nga moabi-abi.

Una na nga gikabani-og sa mga siklesta ang nindot nga mga kadalanan sa Bohol nga naglakip sa sakto nga timpla sa nga tungason ug dulhogon, hinungdan nga ang lain pa nga road bike fun ride nga nailhan sa ngalan nga Giro D Luca, regular na nga mihimo sa ilang tinuig nga mga dagan dinhi.

Apan sa nagkadaghan na nga siklesta ang mi-apil sa Giro D Luca, daghan ang nadismaya sa mi-agi’ng tuig sanglit daghang siklesta nga nahasugamak sa mga kadalanan nga gipangbak-bak ug gipang biyaan, hinungdan nga daghan ang gikagub-an sa ilang mga bisekleta.

Sa kahadlok nga mahitabo gihapon ang susama nga kasinati-an alang sa labing una nga pagsulod sa lumba sa GFNY ug dinhi pa gyud sa Bohol, giseguro sa mga tigpasiugda nga wala nay guba nga karsada ang maagi-an sa ruta.

Sa pagpakigsabut sa mga contractor ug sa mga kalungsuran, gikataho na nga human sa pito na ka buwan nga gipahinog ang gibiyaan nga guba nga bahin sa karsada sa Balilihan, sa katapusan, gilihok na, segun sa post sa usa  ka netster nga taga didto.

Ang karsada sa Balilihan ilabi na gikan sa eskina paingon sa Hanopol ug paingon na sa merkado, may nagpadayon nga pag-ayo, apan wala pa gihapon matibawas.

Kini usab natumbok nga usa sa labing daut nga bahin sa dalan nga agi-an sa lumba.

Gawas sa Balilihan, gihangyo na usab sa GFNY nga kon mahimo, pahamison ang wala pa masumpay nga dalan gikan sa tumoy nga semento sa Rizal Batuan, paingon sa tulay sa Makapiko, tungod kay bisan pa kon makaya ra sakyan sa mga siklesta, lisud kini nga bahin kon kusog na ang dagan padulhog.

Tungod kay ang GYNY ug ang gran fondo nga matang sa lumba, nagtan-aw sa indibidwal nga oras, labing maayo nga dili gyud mohunong ang siklesta aron makab-ot niya ang iyang personal best, pasabut ni David Aliño, local nga organizer sa GFNY, didto sa Kapihan sa PIA. (rahc/PIA-7/Bohol)

MAHIMO MAN DIAY. Ang gireklamo nga piton a ka buwan nga halos wa lihoka nga dalan, gibuhusan ra gayud, human gikataho nga kini maoy agi-an sa international nga mga siklesta nga moapil sa lumba sa international qualifiers sa GFNY. (PIABohol/tampo nga hulagway)