DOLE, mi-awhag sa mga kabataan

sa pagpahimos sa SPES program

TAGBILARAN CITY, January 22 (PIA)--Ang Department of Labor and Employment (DOLE) mi-awhag sa mga estudyante ug out-of-school youth (OSY) sa pagpahimos sa ilang espesyal nga programa aron magbaton og extra income karong bakasyon.

Ang Special Program for Employment of Students (SPES) nga programa sa DOLE nagtinguha sa pagdasig sa mga kabataan sa pagtrabaho matag summer ug Christmas break ug makadawat og insentibo gikan sa ahensya. Kining programa nagtumong sa pagtabang sa mga kabos apan takos nga kabataan nga nagtinguhang makatiwas o maka-lampos sa ilang pagtuon. 

Kining maong programa dili lamang maghatag og dugang kita sa mga estudyante apan magtudlo usab kanila og kabatid o kahanas.

Ang mga madawat nga estudyante sa maong programa pagabayran og cash.  Pwera sa mga low income o ubos og kinitaan nga mga local government units (LGUs), ang employer moabaga sa 60% sa applicable minimum wage o hiring rate, samtang ang DOLE ang mobayad sa nahabiling 40%. Gawas niini, may insurance coverage usab nga balig usa  ka tuig ang estudyante.

Ang mga interesadong aplikante kinahanglang nagpangedaron og 15 anyos taman 30 anyos ug adunay passing grade sa pinakaulahing semester/school year. Alang sa mga OSY, kinahanglang duly certified kini. Ug ang hiniusang net income tax sa mga ginikanan apil na ang kita sa aplikante kinahanglang dili molapas sa regional poverty threshold.

Kinahanglang mo fill-up ang mga interesadong aplikante og SPES Application Form (SPES Form 2). Atol sa aplikasyon, kinahanglang magdala sila og kopya sa ilang birth certificate o bisan unsang opisyal nga dokumento nga magpakita sa petsa sa pagkatawo sa estudyante. Kinahanglan usab e-presentar ang kopya sa labing bag-ong income tax return (ITR) o Certificate of Tax Exemption (CTE) sa mga ginikanan nga gi- isyu sa Bureau of Internal Revenue (BIR) o Certificate of Low Income o Certificate of Indigence nga i-isyu sa barangay o Social Welfare and Development Office (SWDO).

Alang sa mga estudyante, gikinahanglan ang average nga passing grade nga makita sa Form 138/ report card/ class card o sertipikasyon gikan sa school registrar kalabot sa passing grade.

Alang sa OSY, kinahanglan ang sertipikasyon isip OSY nga i-isyu sa Barangay o City/Municipality/Provincial SWDO diin nagpuyo ang estudyate.  (ecb/PIA7-Bohol)