DTI nanawagan sa MSMEs 

Pag-enroll sa “Go Lokal” 

TAGBILARAN CITY, Bohol, January 23, (PIA)—Nanawagan ang Department of Trade and Industry (DTI) ngadto sa tanan nga micro-small ug medium enterprises (MSME) start-ups, social entrepreneurs, kooperatiba, tigpamaligya sa online, ug nga batan-on nga mamumuhunan nga limitado lamang ang exposure sa merkado, sa pag-apil sa programa nga Go Lokal. 

Dawaton sa programa ang mga produkto gikan sa mga nahisgutan sa unahan, ilabi na niadtong rehistrado ug lisensyado, nagmugna og mga produkto nga lahi sa uban, may talagsaon nga desinyo ug putos, makig-ambas sa gipangiita sa merkado ug mao nga nagtumong nga mahimong produktong global. 

Matud sa DTI, ang Go Lokal, usa ka Filipino Concept Store nga public-private partnership alang sa MSMEs, diin dinhi igkita ang mga labing bag-o, labing modern ug 100% nga produktong Pinoy. 

Dinhi, kadtong mga produkto nga innovative, de-kalidad nga gimugna, gihimo ug gidesinyo sa mga MSME sa nasud ug naglantaw nga maka-apil sap alit sa global nga merkado, makaapil sa libre nga marketing platform nga gipabarug sa DTI ug sa mga kapartner niining tigpamaligya pinaagi sa retail aron moy kaluwanan sa mga suppliers pagpaabut sa ilang produkto sa merkado. 

Kini usab dala sa nakita sa DTI nga kasamtangan nga pagtambok sa ekonomiya sa kalungsuran dala sa MSMEs, karon ilang gihagit ang mga MSMEs sa pagpamaayo pa sa ilang mga produkto nga moambas sa global nga sumbanan, aron usab mapadaghan ang halin nga mapaambit na usab ang kita ngadto sa silinganan. 

Dungan niini ang DTI, uban sa Design Center of The Philippines (DCP) magpahuwam sa mga eksperto sa design aron makig-alayon sa MSME sa pag-ugmad sa mga desinyo, putos ug ubang panginahanglan aron mapamaayo pa ang produkto. 

Gikinahanglang nga mofile og Form A o application o Contract form, Form B o Product information sheet, Product Sampkes ubanan sa Foorm D nga Delivery Form, Photocopy sa BIR Forms 2303 ug 0605, Official receipts o Cash Invoice u gang Business Registration. 

Ang uban nga mga Forma, mahimong makuha gikan sa Go Lokal website. 

Inig ka dawat na sa application sa Go Lokal partner, irepaso kini ug suwayan ang mga samples kon makapasar ba. 

Kon maaprobahan na, automatic nga iapil na sa Go Lokal ang imong produkto sa ilang mga display samtang sa dili makapasar, mahimong molagda sa Product development Commitment Form, aron kahatagan sa mga tabang technical sa pagpamaayo pa sa produkto. 

Sa mga interesado, bisitaha ang inyong labing duol nga DTI office o pangutana sa inyong Go Negsoyo Center heads sa mga kalungsuran. (rahc/PIA-7/Bohol)