Mga suba sa Bohol, gitakdang butangan og

warning systems sa PAGASA ug South Korea

TAGBILARAN CITY, January 24 (PIA)--Ang Philippine Atmospheric, Geophysical and Astronomical Services Administration (PAGASA) inabagan sa gobyerno sa South Korea, nagkasabot nga magbutang og early warning systems sa lalawigan sa Bohol nga makatabang sa probinsiya nga mapangandaman ang mga pagbaha. 

Kini ang gipahibalo ni Gob. Edgar Chatto sa mga nitambong sa Provincial Disaster Risk Reduction and Management Council (PDRRMC) Full Council Meeting nga gipahigayon sa Governor’s Mansion niadtong Miyerkoles sa pales.

Matud pa ni Chatto nga ang bahan sa Korea Institute of Civil Engineering and Building Technology (KICT) ug PAGASA administrator Vicente Malano, mibisita kaniya niadtong Lunes sa iyang opisina diin ilang gituki ang inisyatiba sa implementasyon sa maong proyekto.

Gibutyag niini nga ang maong early warning systems maglangkob sa mga nag-unang suba sa lalawigan lakip na ang sa Cortes, Inabanga, Loboc, Garcia Hernandez, Duero, Jagna ug Guindulman.

Giingong sa pagkakaron, gitakda na ang pag-inspeksiyon sa mga suba sa Loboc, Inabanga ug Abatan River sa Cortes nga pangunahan sa bahan sa Department of Land, Water and Environment Research sa KICT.

Sa maong tigom, gipahibalo usab ni PAGASA Bohol head Leaonardo Samar ang pagtukod og ilang buhatan didto sa Bohol Panglao International Airport sa lungsod sa Panglao.

Gibutyag usab niini nga naa na sa 98% ang kahumanan sa estraktura sa Bohol Doppler Weather Surveillance Radar Station nga nahimutang sa Basacdacu, lungsod sa Albur ug gilaomang ma-instalar na kini sa umaabot buwan sa Mayo o Hunyo.

Ang maong P100 milyong pasilidad gipaabot nga makapa-usbaw sa weather monitoring nga motabon sa tibuok kapupud-an sa Pilipinas gamit ang radar ug maghatag sa PAG-ASA ug  dugang kasarang sa mga thunderstorm ug rainfall forecasting.

Nitambong usab sa maong tigom ang bag-ong regional director sa Office of the Civil Defense (OCD) Region 7 nga si Eugene Cabrera diin mipadayag kini sa iyang pagdayeg sa lalawigan sa Bohol kalabot sa inisyatiba sa DRRM.

“Bohol is one of the most admired provinces in the entire country when it comes to initiatives in DRRM,” matud pa ni Cabrera. (ecb/PIA7-Bohol)

Gipangunahan ni Gob. Edgar Chatto ang Provincial Disaster Risk Reduction and Management Full Council meeting kauban nilang PDRRM Officer Anthony Damalerio ug OCD Regional Director Eugene Cabrera niadtong Enero 23, 2019 didto sa Governor’s Mansion, syudad sa Tagbilaran. (ecb/PIA7-Bohol)