National Bible Day matag katapusang Lunes sa Enero,

gi-deklarar nga ‘special working holiday’

TAGBILARAN CITY, January 24 (PIA)--Gi-deklarar nga special working holiday ang National Bible Day matag katapusang Lunes sa buwan sa Enero kada tuig.

Gilagdaan ni Presidente Rodrigo Duterte ang Republic Act 11163 niadtong Disyembre 20, 2018.

Tumong niining balaod nga palisiya sa gobyerno nga iduso ang paglambo sa “moral character” ug “spiritual foundation” sa mga Pilipino.

Gikonsiderar sa balaod nga ang Pilipinas ang adunay pinakadaghang Kristiyanong nasud sa Asia-Pacific.

Gi-ila usab niini ang kamahinungdanon sa bibliya isip pundasyon sa pagtuo sa mga Pilipino nga Kristiyano.

Tungod kay usa man kini ka ‘special working holiday,’ walay trabaho ug klase nga maapektuhan.

Sa mga niagi nga administrasyon nila Presidente Ferdinand Marcos, Corazon Aquino ug Fidel Ramos, gitakda nila ang katapusang semana sa Enero isip “National Bible Week.”  (ecb/PIA7-Bohol)