Sugbo-Getafe-Sugbo, 

Aduna na’y OceanJet 

TAGBILARAN CITY, Bohol, January 24 (PIA)—Makabenepisyo ang mga kalihukang pangturismo sa mga kalungsuran sa amihanang Bohol, sa bag-o nga gibuksan nga ruta sa fastcraft gikan sa Pier 1 sa Sugbo paingon sa Getafe. 

Gibuksan, sugod karong semanaha ang lima ka byahe matag adlaw sa OceanJet Fast ferries gikan sa Pier 1 sa Sugbo paingon sa Getafe, Bohol ug lima usab ka byahe balik sa sugbo, matag adlaw. 

Ang us aka oras nga byahe, mao nay labing dali nga byahe gikan sa Sugbo paingon sa Getafe, nga kuha-on sa OceanJet sa usa lamang ka oras. 

Segun sa kasayuran, ang unang byahe sa Oceanjet mogikan sa Pier 1 sa Sugbo sa may alas 8:15, ug moabut sa Getafe sa alas 9:15. 

Gikan sa Getafe, mobiya na usab ang OceanJet paingon sa Sugbo sa alas 9:30 ug naa na sa Pier 1 sa alas 10:30. 

Pagka alas 11:00, mogikan na usab ang fastcraft sa Pier 1 paingon sa Getafe sa alas 12:00. Mogikan na usab ang barko sa Getafe paingon sa Sugbo alas 12:30 ug anaa na sa Sugbo sa alas 1:30. 

Sa pagka alas 2:00, molawig na usab paingon sa Getafe, ug moabut kini sa Municipal wharf sa alas 3:00 sa palis. 

Human sa mubo nga pahuway, mogikan na usab ang fastcraft 3:15 sa Getafe paSugbo ug naan a sa Pier 1 sa alas 4:15. 

Human sa 45 minutos nga pahuway, sakto nga tingbuhi sa mga trabahante, alas 5:00 mogikan na usab kini sa Sugbo paingon sa Getafe, samtang makadunggo kini sa alas 6:00 sa gabii. 

Alas 6:15 na usab sa gabii kini molawig paingon sa Sugbo, ug sa pagka alas 8:00, kini na maoy last trip gikan sa Sugbo paingon sa Getafe nga moabut sa pantalan alas 9:00 sa gabii. 

Ang Ocean Jet, mohigda sa Getafe kay ang labing una nga byahe niini gikan sa Getafe, alas 6:30 sa buntag, aon ang mga sakay, anaa na sa Sugbo sa alas 7:30 sa buntag, saktong tingsulod sa trabaho ug klase. 

Kinatibuk-an nga 5 ka byahe matag adlawang ikadugang sa mga byahe sa Clarin, nga karon aduna na usab maayong pantalan nga gitrabaho sa Philippine Ports Authority. 

Tungod niini, mas mapasayon na alang sa mga turista nga buot mosuroy sa Danao Extreme Adventure Tourism (EAT) Park, nga nahimutang lang mga 20 kilometros sa ibabaw sa Getafe, dayon derecho nas sa Chocolate Hills, kanaug sa Loboc ug sa mga suroyanan paingon sa Tagbilaran. 

Daku usab kini nga benepisyo nga ikahatag sa Talibon, Trinidad, Bien Unido ug Ubay tungod kay molanat pa man og duha ngadto sa upat ka oras ang ang pili-on nga byahe gikan sa Sugbo sakay sa hinay nga bapor. 

Gani, ang bag-o nga nabuksan nga ruta, nahauna pa sa una na nga gipalubad nga panaw sa fastcraft, nga gilantaw kon natibawas pa ang pag-agni sa mga trabahante sa Mactan Export Processing Zone (MEPZ) nga aron makalikay sa traffic sa Sugbo, dinhi na sa Clarin Inabanga ug Tubigon manimuyo. 

Ang pagawas sa MEPZ, paingon sa kasagaran nga uli-anan sa Sugbo molanat na ang byahe og sobra sa duha ka oras, mao nga mas maayo nga opsyon alang sa mga trabahante sa MEPZ ang dinhi na sa Bohol mamuyo. 

Hinuon, kamolo pa nga trabaho ang sugyot sa tanyag sa housing dinhi sa Bohol, ilabi na ngadto sa mga taga MEPZ, segun sa kasaligan nga tinubdan sa Bohol. (rahc/PIA-7/Bohol)

May barko na sa OceanJet ang maghimo og lima ka panaw matag adlaw paingon sa Getafe ug balik sa Sugbo, butang nga mahimong maka-abag sa pangturismo nga kalihukan sa amihanan ug amihanang-kasubangan sa Bohol. (PIABohol)