IRR sa Mental Health 

Law, gilagdaan na 

TAGBILARAN CITY, Bohol, January 23 (PIA)—Hinay-hinay apan kanunay. 

Sa katapusan, human sa 30 ka tuig nga pagpaningkamot nga makit-an na sa mga magbabalaod ang kamahinungdanon sa mental health, nalagdaan na gayud ni President Rodrigo Roa Duterte ang implementing rules and regulations (IRR) sa Republic Act 11036, o o ang Mental Health Act. 

Daku ang kalipay sa Department of Health (DOH) ilabi na ni Secretary Francisco Duque, kay tungod niini, makahimo na nga may ngipon ang ahensya sa kasanihan, pagpanalipod sa katungod sa mental health sa mga Pinoy. 

Ang Mental Health Law, nagapahimutang sa batakan nga serbisyo alang sa mental health gikan sa nasudnon nga lebel ngadto na sa kabaranggayan. 

Niini, nangandoy ang kagamhanan nga mapataas na ang kapasidad usab sa mga propesyonal nga maoy giisip nga eksperto sa mental health, samtang ang IRR nagpatik sa mga lagda aron matuman sa kagamhanan pinaagi sa DOH, ang pagpanalipod sa katungod nga mental sa mga tawo ilabi na niadtong nagpakita ug pagpanginahanglan sa mental health, ug sa mga propesyonal nga makagiya kanila. 

Sa balaod, gibugkos na dinhi ang psychiatric, psycho-social ug neurological services sa mga rehiyonal, provincial ug tertiary hospitals, nga halos wala pa gani mapahilunan sa tanang tambalanan. 

Usab nasukip na sa balaod ang pagpa-ugmad ug pagpanghiman sa mga pasilidad sa mental care ug gani, nagmandu na sa pagdala sa edukasyon ug kasayuran sa mga tunghaan ug sa trabaho-anan aron mas dali rang sabton ang mental health sa mga katawhan nga yano lang ug naa sa mga kabalayan. 

Niini nga kalambu-an, ang DOH ug uban nga mga ahensya nga katambayayong niini sa pagpatuman sa Mental Health Law, may kapasikaran na sa ilang mga lakang. 

Dugang pa, ug agi og paghangop apil na sa gakus niining balaod ang kadtong mga Pinoy nga tua sa gawas sa nasud. 

Kahinumduman usab nga sa pagpasupot sa Universal Health Care Law, nakompleto na pinaagi niining katikaran. 

Sa panahon sa krisis sa usa ka tawo, may masaligan na nga tinugyanan unya nga andam ug tagana sa pag-ubay niining may mga suliran. 

Sa laing bahin, mas maayo nga mamahimo na nga mas sayon pangitaon ang mga propseyonal nga may ikaabag sa mga tawo nga adunay suliran, aron makunhoran na ang mga sitwasyon sa paghikog, pagtubok ug paghuramentado. (rahc/PIA-7/Bohol)