Enero 23, 28 gideklara nga

“Special working holidays”

TAGBILARAN CITY, Bohol, January 22 (PIA)—Tinuod nga may duha  ka adlaw nga gideklara nga holidays niing buwan sa Enero, apan dili tinuod nga kini panahon sa paghanday handay ug pagtambay.

Walay klase ug trabaho nga maapektohan sa deklarasyon, mao nga walay dugang sweldo ug uban pa’ng benepisyo nga makuha ang trabahante niining mga adlawa gawas na lang sa kasagaran nga gikubra sa inadlaw o binuwan nga kwenta.

Una na nga gikadeklara ang Enero 23 nga Adlaw sa sa kasumaran sa pagsugod sa Unang adlaw nga ang Pilipinas nahimo nga Republika.

Pinaagi sa Republic Act 11014,  o ang balaod nga nagdeklara sa Enero 23 sa matag tuig sa tibuok nasud nga adlaw sa paghandum sa pagkadeklara sa Pilipinas nga Unang nahimo nga Republika.

Giagawas niadtong Abril 5, 2018, ang deklarasyon hinuon tataw nga nagtumbok sa adlaw nga Special Working Holiday sa tibuok nasud. 

Kahinumduman nga niadtong Enero 23, 1899, ang deklarasyon sa First Philippine Republic gihimo sulod sa simbahan sa Barasoain, sa Malolos, Bulacan.

Segun sa Acta Republika 11014, ang National Historical Commission u gang Department of Education natahasan usab sa pagplano ug pagpatuman sa mga sibo nga kalihukan alang sa First Philippine Republic Day, ug  ang kamahinungdanon sa makasaysayanon nga adlaw ikapaneguro nga magpabilin nga magtanum og inspirasyon ug garbo sa mga Pilipino sa puno sa kahalangnon ug ka buhong sa kasaysayan sa nasud.

Sa lain nga bahin, ang Enero 28 usab, gitumbok na nga National Bible Day pinaagi sa Republic Act 11163 nga napasar niadtong Disyember 20, 2018.

Gitumbok usab nga Special Working Holiday, ang pagdeklarar sa National Bible Day Act gipasubay sa polisiya nga ang kagamhanan magtabang ug mag-aghat sa kaugmaran sa moral nga kinaiya ug espirituhanon nga dugukan sa katawhan nga Pilipino.

Isip nasud nga kinabag-an ang mga Kristyanos ug labing daghang kristyanos sa tibuok Asya, kini nga balaod naga-ila sa Bibliya nga maoy subok sa Kristohanon nga pagtuo. (rahc/PIA-7/Bohol)