Foreign travel authority ug leave of absence sa mga

lokal opisyal, awtomatikong kanselado kun may kalamidad

TAGBILARAN CITY, January 28 (PIA)--Awtomatikong kanselahon sa Department of Interior and Local Government (DILG) ang travel authority ug leave of absence sa mga opisyal sa local government units sa pag-biyahe sa gawas o bisan sulod lamang sa nasud kun may kalamidad – natural man o man-made.

Kini ang gipahinumdom ni Sarah Kristina Romanillos, LGOO II ug DRRM Alternate Focal Person sa gipahigayong Provincial Disaster Risk Reduction and Management Council (PDRRMC) Full Council Meeting sa Governor’s Mansion ning syudad niadtong Enero 23.

Matud pa ni Romanillos, base kini sa Office of the President Administrative Order No. 267, s.  1992 diin ang Kalihim sa DILG isip approving authority sa mga request alang sa foreign travel authority ug leave of absence sa bisan kinsang kawani ug lokal nga opisyal sa gobyerno, mahimong mo-recall o awtomatikong mokanselar sa travel authority nga iyang gi- isyu kun may emerhensiya o krisis, natural man o human-induced disaster/calamities.

Alang usab sa authority nga gi-isyu sa local authorities (kun ang gidugayon sa travel o leave of absence dili molapas sa 3 ka buwan o panahon sa walay emerhensiya o krisis), sa panahong may emerhesiya – natural man o man-made, ang gobernador maoy mo-recall sa authority nga gi isyu ngadto sa mga mayor; Sangguniang Panlalawigan members nga ang chairmanship mao ang Peace & Order and Crisis Management, DRRM, Social Welfare and Development and  Women, Youth Children and IP; ug mga department heads.

Matud pa nga ang memorandum gihimo aron masiguro nga ang mga opisyal sa local government units dili mamahimong “missing in action” sa mga panahong kritikal nga kinahanglan sila sa ilang mga konstituwente.

Giingong ang mga local chief executives angay naa sa ilang pwesto ilabi na kun may kalamidad. Kini isip chairpersons sa ilang local disaster risk reduction and management committees, angay nga personal silang mangunay sa lokal nga disaster management preparations and operations.

Matud pa nga personal man o opisyal ang hinungdan sa leave of absence sa mga opisyales, ang ilang katungdanan isip local chief executives gayud ang angay nga unang prayoridad kun may kalamidad, gawas na lamang kun mapatud-an nila nga “legally and physically impossible” alang kaniya nga mohimo sa iyang katungdanan sa maong panahon.

Kahinumdoman nga ning bag-o lang, gipasakaan og kaso sa DILG ang lima ka mayor gikan sa Northern Luzon og kasong administratibo tungod kay “missing in action” o wala sila  samtang gikuso-kuso sa bagyong Ompong ang ilang lugar niadtong Setyembre sa niaging tuig. (ecb/PIA7-Bohol)