PSA family income survey,

nagpadayon karon taman Peb. 8

TAGBILARAN CITY, January 28 (PIA)--Sukad niadtong Enero 10 ning tuig, nagpadayon karon ang mga statistical researchers (SRs) sa Philippine Statistics Authority (PSA) sa pagbisita ug pag-interview sa mga sample households sa nagpadayong Family Income and Expenditures Survey (FIES).

May kinatibuk-ang 1,541 sample households alang sa tibuok lalawigan sa Bohol ang bisitahon sa mga SRs taman matapos ang maong survey sa Pebrero 8.

Ang mga ipangutana sa mga SRs may kalabotan sa income o kinitaan ug expenditures o gasto sa mga tigbalay gikan sa buwan sa Hulyo taman Disyembre 2018.

Ang mga datos nga makuha sa FIES mahinungdanon nga mga inputs sa pagkalkulo sa poverty incidence kun kapobrehon nga maoy himuong basehan sa gobyerno alang sa social ug economic development nga mga plano niini.

Niadtong tuig 2015, migawas nga P20,437 matag buwan ang poverty threshold o minimum income sa usa  ka pamilya o indibidwal sa lalawigan nga makapalit sa basic food ug non-food requirement,  .

Sa maong survey usab nasuta nga 21.7 porsiyento sa mga pamilya o indibidwal ang may minos nga per capita income kaysa poverty threshold.

Si PSA Provincial Statistics Officer Jessamyn Anne Alcazaren nitumbok nga ang kalamposan sa maong survey mag-depende sa kalidad sa datos nga ilang mahipos.   

Mi-awhag ang PSA sa kooperasyon sa mga Bol-anon ilabi na sa mga respondente sa paggahin sa ilang oras ug paghatag sa sakto ug tukmang impormasyon.

Alang sa mga pangutana kalabot sa ilang survey, mahimong motawag sa buhatan sa PSA dinhi sa lalawigan sa Bohol sa telepono 501-0996 o email lang sa psa07.bohol@gmail.com.  (ecb/PIA7-Bohol)