Pagkuha sa PRN sa SSS,

pinaagi sa mobile app

CORTES, Bohol, January 27 (PIA)—Human matibawas ang gipamaayo nga mobile application sa Social Security System (SSS), makahimo na ang mga sakop niini sa pagkuha sa ilang payment reference number (PRN) pinaagi sa internet aron makabayad sa ilang binuwan nga hulogan nga di’ na moadto sa buhatan.

Matud sa usa  ka pamahayag gikan sa SSS,  kadtong mga sakop nga self-employed, voluntary, overseas Filipino workers ug mga walay trabaho nga asawa o bana sa mga sakop, mahimo na nga magdownload sa mobile app ug mo log-in sa My.SSS account’s user ID ug password ug makakuha na sa PRN nga maoy kinahanglan aron makabayad sa binuwan nga kontribusyon ngadto sa mga payment partners.

Kini usab human namatikdan sa SSS nga daghan sa ilang mga sakop ang naglisud og kuha sa PRN, “mao nga gisukip na sa ahensya ang PRN generation sa mga features sa SSS Mobile App, aron mas mapasayon ang regular nga pagbayad sa mga sakop,” matud ni SSS President ug Chief Executive Officer Emmanuel Dooc.

Gani, dugang niya, kon ang sakop wala pay My.SSS account, mahimo na nga kini nga app ang gamiton pagrehistro.

Kon maka sign in na, igo na lamang nga i-click ang “Generate PRN/SOA” nga icon sa home screen ug makakuha na dayon sa PRN.

Dugang pa niini, ang mga sakop, makahimo na usab pagtan-aw, pag-download ug pag edit sa ilang Statement of Account (SOA), ilabi na sa bayranan sa kontribusyon ug sa mga buwan nga bayaran, dugang ni Dooc.

Gawas sa PRN generation, ang bag-ong napamaayo nga mobile app, mahimo na usab nga agi-anan kon mo-apply og pahuwam, maternity notification anag sa mga babaye nga sakop, ug  ang mga detalyado nga kasayuran sa sakop.

Ang mobile app makapakita sa breakdown sa nahulog na nga kontribusyon, ang lista sa mga nabayran  nga buwan, membership information sama sa Common Reference Number (CRN) Social Security (SS) number, pangalan, petsa nga natawhan, contact information (nga mahimo usab nga usabon sa sakop), petsa kanus-a nagsugod ang coverage, ang coverage ug SS number status, ug  ang Unified Multipurpose Identification (UMID) savings account number.

Sa mogamit sa mobile apps, automatic usab nga may confirmation email nga ipadala ngadto sa registered email sa sakop uban ang transaction number sa matag malampuson nga pag-update sa membership information ug sa pagduso sa salary loan application ug maternity notification.

Ang mga interesado, maka download sa app, pinaagi sa Google Playstore o sa App Store samtang kadtong naka download na, kinahanglan lamang kini nga i-update sa labing bag-ong besyon, aghat sa SSS.

Hinuon, ang mobile apps sa SSS, mogana lamang kon ang naggamit, adunay internet o data. (rahc/PIA-7/Bohol)