Malakanyang abri sa pagsilot

sa ginikanan nga nagpasagad

TAGBILARAN CITY, Bohol, January 28 (PIA)—Abri ang Malakanyang sa hunahuna nga adto ihapak ang silot sa mga ginikanan sa usa ka bata nga nakahimo og salaud, labi na ko mapamatud-an nga may dako sila nga p[agkuwang sa tulubagon niini.  

Niadtong mi-agi nga semana, gibutyag ni Presidente Rodrigo Duterte nga bukas siya sa hunahuna nga maoy patubagon sa salaod sa us aka menor de edad ang ginikanan niini nga nagpasagad.

Didto sa usa  ka Summit sa mga tigmaneho ug operators og tricycle didto sa Pasay City, gilitok sa Presidente nga nanghingusog sa pagpadisiplina sa iyang kanhing mga sakop sa Davao City, nga ang mga ginikanan masayud gayud sa criminal nga tulobagon sa usa ka mendor de edad nila nga anak tungod kay mahimo kayo nag sila ma-angin sa salaud subay sa doktrina sa ginikanan nga nagapasagad.

Hinuon, si presidential spokesperson Salvador Panelo, mipaapas sa pag-ingon nga ang huna huna sa Presidente basehan usab sa Ubos Balay Balaoranan sa ilang paghipno pa sa balaod nga magpa-usab sa napatuman na nga Juvenile Justice Act.

Kahinumduman nga giduso sa Ubos Balay Balaoranan ang usa  ka bersyon sa balaodnon nga nagpatangag na sa criminal nga tulubagon sa siyam ka tuig nga bata nga makahimo og salaud.

Hinuon, kon makahimo og salaud, ang bata dili ipaslak sa bilanggu-an apan ipasulod sa youth rehabilitiation facility aron dili matipo sa mga kubalan nga mga kriminal.    

Nahimo na nga isyu ang balaodnon, ilabi na kay daghan ang karon nagpatuo-tuo nga nakabasa sa balaodnon ug mingkomentaryo nga ipapreso sa mga magbabalaod ang mga bata nga nakasala bisan pa og wala pa sa hingkud nga edad.

Sa akong hunahuna, ang gireklamohan sa mangsupak niining mga amendments, mao ang kalibug dala sa sulsol nga  prisohon ang bata nga makasala. Wala man, dili pagkapriso kon dili pagpasulod niini sa rehabilitasyon, dugang pagpasabut ni Atty Panelo.

Ang Palasyo usab uyon sa hunahuna nga ang bata dili angayan nga ipaslak sa bilangguan, ilabi na og itipo sa mga criminal.

Dili mahimo nga isagol ang mga minor de edad sa mga criminal. Kinahanglan sila nga makorehi-an , ipahiuli, tungod kay mahimo sila nga kubalan nga criminal kon ipaslak sa bilanggu-an.

Ang Presidente, nagpadayag na sa iyang hunahuna, naa na sa Kongreso sa pagpatinuod sa iyang ideya. Kon ugaling, madawat sa Kongreso, may dako silang mahimo subay niini, matud ni Panelo, kinsa usab us aka Presidential Legal Adviser.

Alang kang Panelo, samtang ang krimen, personal nga salaud, ang Kongreso mahimo gihapon nga magasup-it sa mga probisyones nga magpahid sa tulubagon sa mga ginikanan kon ang ilang mga anak makahimo og salaud.

Dugang ni Panelo, nagtuo siya nga duna gyud unta’y silot alang sa mga ginikanan kon sila nagpasagad sa ilang trabaho.

Ang ginikanan mao gayud ang tigpanton sa mga bata aron hulmahon sila sa pagka maayo nga molupyo ug responsable nga mga sakop sa katilingban, lakbit saysay sa spokesperson. (rahc/PIA-7/Bohol)