P5,000 multa, ipahamtang sa LTFRB 

sa mga nagpabarug og mga pasahero sa bus 

TAGBILARAN CITY, Jan. 8 (PIA)--Pahamtangan na og P5,000 nga multa ang mga operators sa mga pampublikong sakyana nga masakpang nagpabarog og mga pasahero tungod sa kapuno. 

Kini ang pasidaan sa Land Transportation Franchising and Regulatory Board (LTFRB) 7 ngadto sa mga driber sa bus taliwala sa desisyon sa buhatan sa hugot nga pagpatuman sa ‘no standing’ nga palisiya alang sa mga public utility buses (PUBs) aron malikayan ang overloading. 

Matud pa ni Rey Elnar sa LTFRB-7, ang mga molapas niining palisiya pahamtangan og multa nga P5,000-alang sa unang paglapas, P10,000-sa ikaduhang higayon nga paglapas ug P15,000 ug pag-suspenso sa 30 ka adlaw sa franchise alang sa ikatulong higayon nga paglapas. 

Apan gitataw usab ni Elnar nga ang mga airport bus sa syudad dili apil sa maong palisiya ug nitugot sa mga nagbarog nga mga pasahero kun puno na. 

Ang mga provincial bus apil na ang mga non-aircon units nga bus nga namasahero paingon sa Panglao ang apektado niining palisiya, matud pa ni Elnar. 

Ang overloading sa mga pampublikong sakyanan gidili pinaagi sa Republic Act 4136 o Land Transportation and Traffic Code ug LTFRB Joint Administrative Order 2014-01. 

Matud pa ni Elnar nga ang ‘no standing’ policy gisugdan na pagpatuman niadto pang tuig 2005. 

Apan wala kini gisunod sa ubang mga PUBs sama dinhi sa lalawigan sa Bohol. 

Ang hugot nga pagpatuman niini gimando human giingong nakadawat ang LTFRB og reklamo gikan sa publiko kalabot sa mga bus dinhi sa lalawigan nga magpabarog og pasahero tungod sa kapuno. (ecb/PIA7-Bohol)