Red tide alert, nagpabilin gihapon

sa Dauis ug syudad sa Tagbilaran

TAGBILARAN CITY, Jan. 9 (PIA)--Nagpabilin gihapon ang red tide alert sa kabaybayonan sa lungsod sa Dauis ug syudad sa Tagbilaran base sa bag-ong Shellfish Bulletin nga gipagawas sa Bureau of Fisheries and Aquatic Resources (BFAR).

Sa Shellfish Bulletin No. 31 niadtong Disyembre 28, 2018, nigawas nga ang nagtapad nga lugar sa lungsod sa Dauis ug syudad sa Tagbilaran lamang sa lalawigan sa Bohol ang apektado sa red tide sa tibuok rehiyon sa Central Visayas.

Ang ubang lugar sa Visayas nga apektado sa red tide mao ang Matarinao Bay sa Eastern Samar sa rehiyon sa Eastern Visayas.

Ang ubang lugar nga apektado gihapon sa red tide ubos sa Shellfish Bulletin No. 31 mao ang kabaybayonan sa Lianga sa Surigao del Sur, Puerto Princesa Bay sa syudad sa Puerto Princesa sa Palawan ug ang kabaybayonan sa Pampanga ug Bataan.

Ang mga nahisgotang lugar positibo gihapon sa ‘paralytic shellfish poison’ nga milabaw sa regular limit.

Ang gisundan niining shellfish bulletin nga gipagawas sa BFAR niadtong Disyembre 14, 2018 naghisgot gihapon sa maong mga lugar nga apektado gihapon sa red tide.

Ang maong mga lugar nalakip na sa listahan sa nag-positibo sa red tide sukad pa sa Shellfish Bulletin No. 29 nga gipagawas niadtong Nobyembre 23, 2018 diin ang mga lugar sa Bataan ug Pampanga lamang ang napuno sa maong listahan.

Samtang ang Puerto Princesa Bay napuno lamang sa Shellfish Bulletin No. 28 niadtong Nobyembre 8, 2018.

Base sa maong mga resulta, makita nga ang kabaybayonan sa lungsod sa Dauis ug syudad sa Tagbilaran lamang ang pinakadugay nga nagpabilin sa listahan nga niabot na og 10 ka buwan sukad niadtong Marso sa niaging tuig.

Tungod niini, gi-awhag ni BFAR-Bohol OIC Candido Samijon ang mga lokal nga kagamhanan sa pag-monitor sa kamerkadohan sa ilang mga lugar sa mga kinhason nga gibaligya nga posibleng nakuha sa kadagatan sa Dauis ug syudad sa Tagbilaran.

Matud pa sa BFAR nga ang mga isda, pasayan ug alimango luwas ra kan-on kun lab-as kini ug gihugasan og maayo ug ang mga sulod sa ginhawaan sama sa hasang ug tinai kuhaon sa dili pa kini lutuon. (ecb/PIA7-Bohol)