130 ka mga fiberglass nga

Sakayan, ipanghatag libre

TAGBILARAN CITY, Bohol, Sept 18 (PIA)—Sa ika duha nga higayon, manghatag ang agamhanang Probinsyal sa Bohol og 130 ka mga sakayan’g de motor ug mga bugsayan nga ginama sa mas lig-on nga fiberglass, ngadto sa mga kalungsuran nga nahilakip sa mga may mga mananagat.

Kini human matun-I sa Sangguniang Panlalawigan ang sugyot pinaagi sa Sangguniang Panlalawigan Committee on Agriculture ug Committee on Finance, Budget and Appropriations nga tugutan si Gob Erico Aristotle Aumentado sa pagpakiglagda sa Memorandum of Agreement tali sa Kapitolyo, Bureau of Fisheries and Aquatic Resources (BFAR) Region 7, ug lokla nga mga kagamhanan kang kinsa nga mga People’s Organization aktibo nga nahilambigit sa pagpangisda.

Ang pagpanghatag sa libre nga mga sakayan nga de motor ug bugsayan, dili na bag-o kay niadtong panahon sa pandemya, nanghatag usab ang kapitolyo og 100 ka mga sakayan nga fiber glass, kini segun pa ni Assistant Provincial Agriculturist Larry Pamugas.

Subay sa Republic Act 8435 o ang Agriculture and Fisheries Modernization Act, isukip sa Agriculture and Fisheries Modernization Plan, ang pagpasayon sa akses sa mga mangingisda ang tabang ug mga teknolohiya aron mas modaghan pa ang isda sa kamerkadohan.

Niini, gilauman nga ang pagpanghatag og 130 ka mga fiberglass boats nga libre, makadugang sa panginabuhian ug panud-an sa mga nangisda, ug niini, makatabang sa pagpa-asdang sa ekonomiya.

Ang libre nga mga bugsayan ug sakayan nga de motor, ipatuman sa Kapitolyo pinaagi sa Office of the Provincial Agriculturist ug ipangapud apod ngadto sa mga kahugpungan samga mananagat sa: 47 ka 22 ka piyes nga sakayang de motor sa Unang Distrito, 27 sa ikaduhang Distrito ug 56 sa ikatulo nga Distrito.

Niini, ang Kapitolyo maoy mohatag sa pundo ug gamit sa pagpanday sa mga sakayan nga dto himoon sa Gabi, Ubayug mao usab ang mobansay s amga kahugpungan sa pag-atiman sa nasampit nga mga sakayan.

Ang BFAR usab maoy maghatag sa teknikal nga tabang ug paghatag kapasidad s amga benepisaryo sa pagdumala sa mga sakayan, samtang ang mga kalungsuran, pinaagi sa ilang mga Municipal Agriculture Office (MAO), maoy magpili sa mga benepisaryo subay sa selection standards/criteria alang sa mga modaway.

Ang MAO usab maoy regular nga maghatag og taho nagdto sa Kapitolyo sa panagatan sa mga benepisaryo. (RAHC/PIABohol)

MAS LIG-ON. Ipanghatag sa Bohol ang 130 ka mga sakayan panagatan nga ang kasko hinimo sa fiberglass, ug dili dali mo tugob sa tubig ug mabu-ak kon madakdak, aron sila makatabang sa pagpadaghan sa isda sa kamerkadohan, ug matubag ang suliran sa food security. (PIABohol)