Mga miyembro sa Philhealth gipahinumdoman

kalabot sa leptospirosis ug dengue coverage

TAGBILARAN CITY, Bohol (PIA)--Ang Philippine Heath Insurance Corporation (Philhealth) nipahinumdom sa mga miyembro nga ilang gi-cover ang pagpatambal sa leptospirosis ug dengue.

Matud pa sa gipagawas nga pahayag sa state health insurer, ang mga miyembro mahimong maka-avail sa P13,000 nga dengue fever benefit package samtang P16,000 alang sa dengue hemorrhagic benefit package.

Samtang ang mga apektado sa leptospirosis mahimong maka-avail sa benefit package nga nagkantidad og P14,300.

Gipasakaan ang coverage sa grabeng dengue hemorrhagic fever gikan sa P16,000 ngadto na sa P47,000 apan gipaabot pa nga mo-epekto human sa pagpagawas sa bag-ong polisiya.

Gipasiugda sa PhilHealth nga ang tanang Pilipino angayan nga maka-avail niining mga benefit packages sa bisan unsang PhilHealth-accredited health facilities sa tibuok tuig, apil na ang mga miyembro nga wala makabayad o adunay kabalaka sa ilang mga kontribusyon.

Ang mga akreditado nga ospital ug uban pang pasilidad sa panglawas sa PhilHealth kinahanglan nga motuman sa polisiya sa paghatag sa hustong benepisyo sa mga miyembro sa dili pa mogawas. Ang mga isyu nga may kalabotan sa kontribusyon sa miyembro mahimong husayon ​​human sila makadawat og tabang ug sa pagpatambal nga ilang gikinahanglan, matud pa sa PhilHealth.

Base sa datos sa Department of Health (DOH), nagpadayon ang pagsaka sa kaso sa dengue sa nasud karong panahon sa ting-ulan diin misaka sa 25% ang kaso gikan niadtong Agosto 4 ngadto sa 17 nga adunay 36,335 ka kaso.

Sa kinatibuk-an gikan sa Enero hangtod Setyembre 6, 2024, adunay kinatibuk-an nga 108,965 nga kaso sa dengue sa nasud.

Samtang sa leptospirosis, adunay kinatibuk-an nga 123 ka mga kaso ang natala sa tibuok nasud gikan sa Agosto 18 ngadto sa 31 nga naobserbahan nga misaka human sa pagkusokuso sa bagyong Carina ug Habagat niadtong Hulyo nga maoy hinungdan sa pagkaylap sa pagbaha sa Metro Manila ug ubang dapit sa nasud. (ECB/PIA7-Bohol)