Kawani sa LGU-Tagbilaran City, nat’l winner

sa 2024 Search for Outstanding Gov’t Workers

TAGBILARAN CITY, Bohol (PIA)--Usa ka kawani sa local government unit sa Tagbilaran City ang nahimong national winner sa 2024 Search for Outstanding Government Workers ubos sa kategorya nga CSC Pagasa Award.

Si Adelfa T. Salutan, Admin. Officer V, gihatagan og award alang sa iyang maimpluwensyang pagpangulo ug pagtukod sa Tagbilaran City Garments Manufacturing Center, usa ka mahinungdanong hub alang sa economic empowerment ug skills development nga nagpatunghag malungtarong mga programa sa panginabuhian, empowered women, ug uban pang marginalized groups.

Mismong si Presidente Ferdinand R. Marcos Jr. ang nitunol sa award niadtong Miyerkules sa gipahigayong awarding ceremony alang sa 2024 Outstanding Government Workers sa Palasyo sa Malacañan sa Manila.

Ang Civil Service Commission (CSC) mao ang nanguna nga ahensya sa pag-ila ug paghatag og award sa mga kawani sa gobyerno alang sa ilang talagsaong kontribusyon, kalampusan, ug pamatasan sa ilang tagsa-tagsa nga karera sa serbisyo publiko.

Ubos sa Honor Awards Program sa CSC, ang tinuig nga pagpangita nagtumong sa pag-ila sa mga alagad sibil nga nagpakita sa talagsaong pasundayag, talagsaon nga mga buhat o serbisyo nga nakatampo sa pagkab-ot sa kahusayan, ekonomiya, ug pag-uswag sa mga operasyon sa gobyerno, ug makanunayon nga pagpakita sa sulundon nga pamatasan.

Tulo ka mga kategorya sa award ang naglangkob sa tinuig nga Honor Awards Program sa CSC. Lakip niini ang Presidential Lingkod Bayan, Outstanding Public Officials and Employees Award o Dangal ng Bayan, ug ang CSC Pagasa Award.

Ang CSC Pagasa award nag-ila sa talagsaong kontribusyon nga direktang nakabenepisyo sa labaw sa usa ka departamento sa gobyerno.

Ang seremonya mao ang kulminasyon sa ika-124 Philippine Civil Service Anniversary nga gisaulog matag Setyembre.

Si Salutan nakadawat og Presidential plaque nga adunay citation nga gilagdaan sa Presidente, usa ka gold-gilded medallion, ug insentibo nga nagkantidad og P200,000. (ECB/PIA7-Bohol)

Mismong si Presidente Ferdinand R. Marcos Jr. ang nitunol sa plake kang Adelfa T. Salutan sa gipahigayong awarding ceremony alang sa 2024 Outstanding Government Workers sa Palasyo sa Malacañang sa Manila niadtong Setyembre 18. (PCO photo)