Gov Aris: Klase gikan sa Kinder

Ngadto’s Hischool, suspendido

TAGBILARAN CITY, Bohol, Oct 21 (PIA)—Gipasuspenso ni Gobernador Erico Aristotle Aumentado ang tanang klase gikan sa Kindergartenn ngadto na sa High School sa publiko ug mga pribadong tulunghaan sa tibuok Bohol sa Octobre 22, 2024, agi og pagpalikay sa katawhan ug sa ilang mga banay sa dautang panahon.

Pinaagi sa Memorandum Circular pinetsahan Oktubre 21, gimandu usab sa gobernador ngadto sa mga mayor ug ilang tagsa-tagsa ka Municipal Disaster Risk Reduction Management Council sa pagpadayon sa ilang monitoring sa kahimtang sa ilang mga tagsatagsa ka area of responsibility ug paghimo og mga pagpamakwit, kon gikinahanglan, subay sa unod ug tumong sa Provincial Ordinance No 2021-014.

Ang hukom sa gobernador base na usab sa sugyot sa Provincial Disaster and Risk Reduction management Officer kinsa mingtambong sa Weather Updating sa RDRRM kabahin sa bagyo nga si KristinePH, nga nakasulod na sa Philippine Area of Responsibility.

Samtang ang bagyo anaa pa sa ibabaw sa Philippine Sea, nakita sa RDRRMC nga aduna kini daku nga posibilidad nga magtigum pag daghang uwan ug kusog nga hangin, nga magpagrabe sa pagbaha ug pagkahunlak sa yuta nga mahumokan na sa uwan.

Segun sa banabana sa panahon, ang Bohol ugma pohon, mahimong makasinati sa kusog nga bunok sa uwan nga molanat sa dugay nga panahon ug kini magdala pag huros nga sama sa unos ilabi na sa mga kabaybayonan ug sa mga lugar nga buntaog sa hangin.

Ang pagsuspenso sa klase, us aka pamaagi sa pagpalikay sa mga Bol-anon ug sa ilang mga sakop sa banay, sa hulga sa dautang panahon.

Gani, gipahimangnoan usab sa gobernador ang mga nanimuyo sa mga lugar nga sagad bahaan, mga kabaybayonan ug kadtong naa sa mga kabukitan nga bantang sa hangin ug pagkahunlak sa yuta sa paghimog pagpangandam. (RAHC/PIA_7/Bohol)

PAGLIKAY SA PELIGRO. Dala sa dautang panahon nga gibanabana na nga magpabunok ug magpakusog sa hangin dala sa bagyo’s Kristine, gipasuspenso na ni Gob Erico Aristotle Aumentado ang klase gikan sa kindergarten nagdto sa High School sa tanang eskwelahan publiko ug pribado, aron mahalikay ang kabataan sa kakuyaw sa pagbaha ug pagdahile sa nahumokan nga yuta. (PIABohol/Anthony Damalerio)